ԱԺ ՀԱԿ խմբակցության պատգամավոր Գագիկ Ջհանգիրյանը մարտիմեկյան իրադարձությունների բացահայտման հետ հույսեր է կապում: Փետրվարի 28-ին ԱԺ ճեպազրույցների ժամանակ նա նշեց, որ տեղյակ չէ՝ ինչու ժամանակին ՀՀ առաջին նախագահ Լևոն Տեր-Պետրոսյանը չի ընդունել Մարտի 1-ի հանձնաժողովի կողմից հղած հրավերը և չի ներկայացել հարցաքննությանը: Ջհանգիրյանը նկատեց՝ խոսքը հավանաբար ոչ թե հանձնաժողովին ներկայանալուն է վերաբերում, այլ նրան, որ ՀԱԿ-ը ժամանակին հանձնաժողովում մասնակից չի ունեցել, իսկ Կոնգրեսն այն ժամանակ իրապես թեկնածու չի ներկայացրել՝ մասնակցելու հանձնաժողովի աշխատանքներին։
«Գուցե այդ պահը բաց եմ թողել, որովհետև այդ ժամանակ գտնվել եմ հայտնի վայրերում, ինձ թվում է՝ հարգելի պատճառներով, բայց տեղյակ էլ չեմ, որ գնացել են նաև մյուս նախագահները՝ երկրորդ, երրորդ։ Կարծում եմ այդ դեպքում հրավերը խիստ խտրական է և նախագահ Լևոն Տեր-Պետրոսյանը ճիշտ է վարվել՝ չընդունելով այդ հրավերը»,- ասաց նա: Դիտարկմանը, թե՝ իշխանափոխությունը կարող է դառնալ մարտիմեկյան դեպքերի բացահայտման միակ միջոց, Ջհանգիրյանն արձագանքեց, որ վեց տարի է՝ որևէ հանցագործություն չի բացահայտվել, եթե հետևել են, թե ովքեր են դատապարտվել, ապա տեղյակ կլինեն՝ մոտ 90 քաղաքացի, որոնք շարժման ներկայացուցիչներ են, երկու ոստիկան՝ ձևական դատապարտված, ովքեր համաներմամբ ազատվել են, մի 15-16 թալանչիներ, որ սադրիչ խմբերի կազմում իրականացրել են հարակից տարածքների թալանը, գողությունը և այլն:
«Ստացվում է՝ բոլոր դատապարտվածները քաղաքական ընդդիմության ներկայացուցիչներ են, և մինչ օրս որևէ մեկը քաղաքական հանցագործության համար չի դատապարտվել, բայց մենք չեմ ասում՝ մեղադրում ենք իշխանությանը: Ես առայժմ հույս ունեմ, որ իշխանությունն իր մեջ քաղաքական համարձակություն կգտնի. ի վերջո, այս կերպ առաջ շարժվել հնարավոր չէ, Հայաստանի նման երկիրը չի կարող ոտքերը ծանրաձողերի կպած առաջ շարժվել»,- ասաց նա՝ համոզմունք հայտնելով, որ իշխանության համար Մարտի 1-ի հարցերն ուսումնասիրող հանձնաժողով չստեղծելն ավելի անբարենպաստ է լինելու, քան ստեղծելը:
