«ԱրմԹեք» համաժողովն այս տարի կանցկացվի հոկտեմբերի 10-11-ը։ Ինչպես այսօր ասուլիսում հայտնեց համաժողովի կազմակերպիչներից մեկը՝ «Ձեռնարկությունների ինկուբատորներ» հիմնադրամի տնօրեն Բագրատ Ենգիբարյանը, որոշվել է համաժողովն անցկացնել Հայաստանում, քանի որ նշվում է ՀՀ անկախության 20-ամյակը:
«Հայաստանը միջավայր է ծրագրերի, ներդրումների և նոր գաղափարների համար»,- ասաց Բ. Ենգիբարյանը՝ հավելելով, որ դա պետք է ցույց տրվի նաև աշխարհին: Համաժողովն անցկացվելու է ՀՀ վարչապետ Տիգրան Սարգսյանի բարձր հովանու ներքո, «Սինոփսիս Արմենիա» ընկերության հայկական զարգացման գործակալության աջակցությամբ, համաժողովի գլխավոր հովանավորն է «ՎիվաՍել-ՄՏՍ» ընկերությունը:
Ենգիբարյանը նշեց, որ այս համաժողովը իր ձևաչափով կտարբերվի նախկիններից, երբ քննարկվող բաժինները թեմատիկ էին: Այս տարի թեմատիկ բաժանումները կատարվել են այլ կերպ`կրթություն, գործարար միջավայր, տարածաշրջանային զարգացումներ և այլն: Համաժողովին ներկա կլինեն բարձրաստիճան հյուրեր Հնդկաստանից, հարևան երկրներից, ԱՄՆ-ից, Եվրոպայի և Լատինական Ամերիկայի երկրներից:
Պատասխանելով «Առաջին լրատվականի» այն հարցին, թե ի՞նչ նոր կազմակերպությունների մուտք է հայտարարվելու Հայաստան՝ Ենգիբարյանն ասաց, որ դրանք են սինգապուրյան աշխարհում ամենամեծ ինժեներական կազմակերպությունը, «Կինետիկ» և «Դլինկ» ընկերությունները:
«Սինոփսիս-Արմենիա» ընկերության գլխավոր գործադիր տնօրեն Ռիչ Գոլդմանը կարևորեց Հայաստանում ազատ ձեռներեցության և ինտելեկտուալ ուժի խթանումը, կրթության ոլորտում ներդրում կատարելը, հատկապես բուհական: Նա նշեց, որ ակնկալում է նույնպիսի հետաքրքիր համաժողով, ինչպիսին, որ տեղի էր ունեցել Սիլիկոնյան հովտում:
