ՄԻԵԴ-ի որոշումները չեն գնահատում, չեն քննարկում, այն ընդունում են ի գիտություն. Մենք ի գիտություն պետք է ընդունենք, որ Մայրապետյանի գործով Եվրոպական դատարանը նման արագությամբ նման որոշում կայացրեց։ Այս մասին «Առաջին լրատվական»-ի հետ զրույցում նշեց ԲՀԿ խմբակցության պատգամավոր Նաիրա Զոհրաբյանը՝ անդրադառնալով Մայրապետյանի գործով ՄԻԵԴ որոշմանը, որով ՀՀ կառավարությանը ցուցում է տրվել շտապ կերպով ապահովել Սամվել Մայրապետյանի առողջական վիճակին համապատասխան բուժօգնություն՝ համաձայն բժիշկ մասնագետների ցուցումների՝ այդ թվում տրանսլյումինալ դրենավորման մեթոդի կիրառմամբ:
«Ես այստեղ համաձայն եմ իմ գործընկեր Էդմոն Մարուքյանի հետ, որ շատ բացառիկ են լինում դեպքերը, երբ Եվրոպական դատարանը նման արագությամբ վարույթ ընդունի գործ, ավելին՝ սկսի նման արագությամբ քննարկել ու արձագանքել, որովհետև գործեր կան, որ տարիներով, մինչև 10 տարի ձգձգվում ենմինչև գործի քննության սկսելը։ Ընդամենը պետք է հետևություն անել սրանից։ Ես այս հարցի համատեքստում հորդորեցի մեր դատական համակարգին պատասխանատու լինել բացառապես օրենքի առջև, առաջնորդվել բացառապես օրենքով»,-հայտարարեց Նաիրա Զոհրաբյանը։ Նրա խոսքով, այն, որ մեր դատական համակարգի գործունեությունը խնդրահարույց է, դա փաստ է. «Դատավորների գերակշիռ մեծամասնությունն առաջնորդվում է հին Հայաստանի խաղի կանոններով և անընդհատ ներքին գրաքննություն է իրականացնում, և եթե նույնիսկ իշխանությունից զանգ չկա, իր ներսի գրաքննիչը անընդհատ իրեն ստիպում է պատասխանատու լինել ոչ թե օրենքի առջև, այլ վերցնել պատասխանատվություն և առաջնորդվել քաղաքական իրողություններով»։
