Ռոբերտ Քոչարյանի գրասենյակի ղեկավար Վիկտոր Սողոմոնյանը հայտարարել է, որ երկրորդ նախագահը քաղբանտարկյալ է, և այդ կապակցությամբ հստակ համոզում կա նաև Հայաստանից դուրս, և «մեր հիմնական արտաքին քաղաքական գործընկերները արդեն հստակ համապատասխան եզրահանգումներ են արել և ձևակերպել են իրենց մոտեցումները Քոչարյանի գործի վերաբերյալ հենց այս տրամաբանության լույսի ներքո»: Նա ասել է, թե վստահ է, որ ժամանակի հետ իշխանությունը կհամոզվի դրանում: Ի՞նչ ժամանակի մասին է խոսքը՝ Սողոմոնյանը չի հստակեցնում: Եվ բնականաբար հետաքրքիր է նաև, թե ի՞նչ «հիմնական» գործընկերների մասին է խոսքը: Մի հիմնական գործընկեր կամ ընկեր հայտնի է՝ ՌԴ նախագահ Պուտինը, որը, սակայն, ինքն էլ առ այսօր խուսափել է անդրադառնալ Քոչարյանի գործի, այսպես ասած, քաղաքական ասպեկտին:
Պուտինն իհարկե երկու ցուցադրական շնորհավորանք է հղել երկրորդ նախագահին՝ ծննդյան տարեդարձի և Նոր տարվա կապակցությամբ, սակայն միևնույն ժամանակ նրա խոսնակը կարճ ժամանակ անց, այսպես ասած, պարզաբանելով այդ շնորհավորանքները՝ ընդգծել է, որ դրանք կրել են ընկերական բնույթ: Խոսքը Կրեմլի խոսնակ Պեսկովի մասին է:
Միևնույն ժամանակ որևէ մեկն իհարկե միամիտ չէ՝ հասկանալու համար, որ ՌԴ նախագահի հրապարակային շնորհավորանքը Հայաստանում քրեական հետապնդման ենթարկվող նախկին նախագահ Քոչարյանին արդեն իսկ որոշակի քաղաքական ակտ է: Բայց նաև ուշագրավ է, որ ՌԴ նախագահը ընդգծված զերծ է մնում թեկուզ իր խոսնակի միջոցով որոշակի քաղաքական անդրադարձ կատարել խնդրին, և այդ առումով թերևս միակ՝ առաջին ու վերջին պաշտոնական քաղաքական անդրադարձը Լավրովի հայտնի հայտարարությունն էր դեռևս հուլիսին:
Այդ իմաստով նկատելի է, որ ինչքան երկրորդ նախագահ Քոչարյանի թիմը փորձում է՝ իհարկե նկատելի զսպվածությամբ, բայց հրապարակային, շոշափելի տեսք տալ Ռուսաստանից աջակցությանը, նույնքան Ռուսաստանի իշխանությունը փորձում է հնարավորինս զերծ մնալ իր աջակցության հրապարակայնացումից՝ թերևս պատկերացնելով դրա հանրային արձագանքի ոչ շահեկանությունը:
Սրան զուգահեռ՝ երկրորդ նախագահի գրասենյակի ղեկավարը հայտարարում է, որ ժամանակի հետ նոր իշխանությունը կհամոզվի Ռոբերտ Քոչարյանի քաղբանտարկյալ լինելու առումով արտաքին ձևակերպումների առկայության հարցում: Դա զգացվելու է դիրքորոշումների հրապարակայնացումո՞վ, թե՞ ներքին, այսպես ասած՝ հետնաբեմային, քաղաքական խոհանոցային ճնշումների մեխանիզմով կամ դրանց ուժգնացման, եթե նկատի առնենք, որ, օրինակ, այդպիսի ճնշում է դիտարկվում գազի գնի հարցը: Թեև այստեղ իհարկե ամեն ինչ այդքան էլ միարժեք չէ, և համենայնդեպս առայժմ տեղի ունեցողը վկայում է փոքր-ինչ ավելի լայն գործընթացի մասին, քան Ռոբերտ Քոչարյանի ճակատագրով Ռուսաստանի մտահոգությունն է: Բայց այդ մասին՝ այլ առիթով:
Տվյալ պարագայում հարցն այն է, թե առաջիկայում արտաքին ի՞նչ նոր դրսևորումներ են սպասվում Ռոբերտ Քոչարյանի գործի առնչությամբ, որ փաստորեն ազդարարում է նրա գրասենյակի ղեկավարը, և դրանք սպասվում են Ռուսաստանի՞ց միայն, թե՞ նաև այլ կենտրոններից: Համենայնդեպս՝ որո՞նք են «մեր հիմնական գործընկերները» երկրորդ նախագահի գրասենյակի ղեկավարի պատկերացմամբ, ո՞ր արտաքին կենտրոններն են դրանք: Եվ արդյո՞ք այդ կենտրոնները պատկերացնում են, որ երկրորդ նախագահի քաղբանտարկյալության վերաբերյալ իրենց որևէ ձևակերպում Հայաստանի հանրությունը կարող է վերաձևակերպել բումերանգի էֆեկտով՝ դատելով խնդրի վերաբերյալ հանրային տրամադրությունների քարտեզից կամ տեսակարար կշռից:
Մյուս կողմից՝ երկրորդ նախագահի գրասենյակի ղեկավարը իր հերթին խոսում է մի բանի մասին, ինչի մասին երբ խոսում էր ընդդիմությունը Քոչարյանի պաշտոնավարման ընթացքում, անմիջապես ստանում էր իշխանության արձագանքը «սպիտակեղենը դուրս չհանելու» կամ «դրսից տղա» չբերելու վերաբերյալ: Մի բումերանգ փաստորեն արդեն աշխատում է:
Լուսանկարը՝ Armeniasputnik-ի
