Գյումրու «Չերքեզի ձոր» տարածքում ինքնակամ կառույցների օրինականացման խնդրի վերաբերյալ

«Շիրակ կենտրոնը» տեղեկատվության հարցում է ուղղել Գյումրու քաղաքապետ Վարդան Ղուկասյանին: Հարցման բովանդակությունը ներկայացնում ենք ամբողջությամբ:

Ինչպես գիտենք, Գյումրու «Չերքեզի ձոր» տարածքում հիմնականում երկրաշարժից հետո տասնյակ անօթևան ընտանիքներ տեղադրեցին տնակներ, ինչպես նաև կառուցեցին քարաշեն և կիսաքարաշեն բնակելիներ: Իսկ նույն` երբեմնի ծառապատ և գեղատեսիլ ձորին հարող տարածքում կան տասնյակ քարաշեն տներ, որոնք կառուցվել են դեռևս նախորդ դարի 50-ական թվականներին:

Այդ թաղամասի բնակիչները բազմիցս են դիմել տարբեր ատյաններ իրենց ինքնակամ բնակելի կառույցներն օրինականացնելու խնդրով: Սակայն, ինչպես գիտենք, Գյումրու գլխավոր հատակագծով այդ տարածքը համարվում է կանաչ գոտի, ուստի այնտեղ կառուցված շինությունները ենթակա չեն օրինականացման: Ավելացնենք, որ մեր դիտարկումներով` այդ թաղամասի ժամանակավոր և ինքնակամ բնակելի կառույցներում բնակվողների գերակշիռ մասը պետության կողմից բնակարանային փոխհատուցման ենթակա չեն:

Վերջին շրջանում հանրապետական մամուլում մի շարք հրապարակումներ եղան այն մասին, որ ինչ-որ անձինք թաղամաս են այցելել և իբր թե սեփականաշնորհման համար` բնակիչների զբաղեցրած տարածքների չափագրումներ են իրականացրել, դրա համար յուրաքանչյուր ընտանիքից գանձել են 20,000-ից 30,000 դրամի չափով գումարներ, սակայն որևէ փաստաթուղթ չեն տվել: Ավելին, բնակիչները չգիտեն անգամ նրանց անուն-ազգանունները և չափագրող կազմակերպության անվանումը: «Չերքեզի ձորի» բնակիչներն իրենց ինքնակամ կառույցների օրինականացման խնդրում ստեղծված անորոշության մասին մտահոգություններ հայտնեցին նաև մեր հանդիպման` նախորդ օրը թաղամաս կատարած մեր այցելության ժամանակ
Առաջնորդվելով ՀՀ «Տեղեկատվության ազատության մասին» օրենքով, խնդրում եմ տրամադրել հետևյալ տեղեկությունները.

1. Արդյո՞ք քաղաքապետարանը տեղյակ է «Չերքեզի ձոր» թաղամասի բնակչությունից չափագրման և քարտեզագրման պատճառաբանությամբ գումարներ գանձելու դեպքի մասին,

2. եթե կատարվել է անօրինական գործողություն, արդյո՞ք այդ մասին տեղյակ պահվել են իրավապահ մարմինները,

3. Գյումրիում ինքնակամ կառույցների օրինականացման նպատակով ո՞ր կազմակերպություններն են իրականացնում չափագրման և քարտեզագրման աշխատանքները,

4. Գյումրու քաղաքապետարանն ի՞նչ ծրագրեր ունի այդ թաղամասի բնակելիների օրինականացման և առհասարակ «Չերքեզի ձորի» վերականգնման ու զարգացման համար,

5. արդյո՞ք «Չերքեզի ձորի» տարածքից որոշ հատվածներ տրված են երկարաժամկետ վարձակալության որևէ անհատի կամ կազմակերպության: Եթե այո, ապա ու՞մ, ի՞նչ հիմքով և քանի՞ տարի ժամանակով,

6. եթե կանաչ տարածքը վերականգնելու նպատակով այնուամենայնիվ բնակելիները ենթակա են քանդման, ապա ինչպե՞ս են լուծվելու այդ թաղամասում բնակվող ընտանիքների բնակարանային խնդիրները: Ինչպես է լուծվելու նաև այդ տարածքում գործող, Գյումրու ռուսական ռազմակայանին պատկանող հսկայական լվացքատունը տեղափոխելու հարցը, որի ծառայությունից օգտվող օրական տասնյակ բեռնատար մեքենաներ են մուտք գործում «Չերքեզի ձորի» կանաչ տարածք:

«Շիրակ կենտրոն» ՀԿ նախագահ` Վահան Թումասյան