«2014թ-ից սկսած՝ մտորումների մեջ էի, այդ ժամանակ ստեղծվեցին մի շարք կուսակցություններ, այդ թվում՝ Ն. Փաշինյանը նախաձեռնեց ՔՊ-ի հիմնադրումը: 2015-ին երկու որոշման առաջ էի կանգնած՝ առաջինը՝ արդյո՞ք պետք է մնամ քաղականության մեջ, թե՞ ոչ. ես անկախ պատգամավոր էի՝ հասարակական սեկտորի ներկայացուցիչ: Եվ երկրորդ որոշումն այն էր, թե եթե մնում եմ քաղաքականության մեջ, ապա ինչ ձևաչափով,- «Առաջին լրատվական»- ի հետ զրույցում այս մասին ասաց «Լուսավոր Հայաստան» կուսակցության ցուցակը գլխավորող պատգամավորության թեկնածու Էդմոն Մարուքյանը: – Քաղաքական գործընթացների լոկոմոտիվը կուսակցությունն է: Որոշեցի մնալ քաղաքականության մեջ և հիմնել կուսակցություն, քանի որ կային գաղափարակիցներ, և երկար քննարկումների արդյունքում հանգեցինք լուսավորչական գաղափարախոսության վրա հիմնված նախաձեռնությանը: Դրանք մարդու արժանապատվության վրա խարսխված գաղափարներն են, որտեղ մարդը, նրա հիմնարար ազատությունները և իրավունքները կենտրոնական արժեքներ են: Մարդուն երջանիկ դարձնելու նախաձեռնությունները հենց լուսավորչական գաղափարախոսության ակունքներում են ընկած: 2015-ին հիմնեցինք «Լուսավոր Հայաստան» կուսակցությունը»:
«Մենք սուր խոսակցություն ենք ունեցել քաղաքացիների հետ նախորդ ընտրությունների ժամանակ: Պատահել է, որ մարդը արդեն փող էր վերցրել այլ քաղաքական ուժից ու ասում էր՝ բոլորդ նույնն եք, խոստումներ եք տալիս ու չեք կատարում, այն դեպքում, երբ մենք առաջին անգամ էինք մասնակցում ընտրություներին, մինչ այդ «Ելք» դաշինքը չկար… Հազարավոր մարդկանց ես հանդիպում քարոզարշավի ընթացքում, ու հանկարծ մեկը դուրս է գալիս ու մեղադրում քեզ, այն դեպքում, երբ դու օրնիբուն պայքարում ես իր շահերը պաշտպանելու, իր թոռների ապագան կերտելու համար: Բայց չենք կարող չաշխատել մեր ժողովրդի հետ, չփոխել նրան: Քաղաքական էլիտաների դերը ո՞րն է. պետք է առաջնորդել ժղովրդին, ճիշտ մոտեցումներ տալ»,- նշեց Մարուքյանը:
Ազգային ժողովը կլինի հիմնակա՞ն, թե՞ ինչպես ասում են վերջին շրջանում՝ անցումային. ի պատասխան այս հարցի՝ Էդմոն Մարուքյանը նշեց, որ այն մարդիկ են կարծում, որ առաջիկա ԱԺ-ն կլինի անցումային, ովքեր մի քանի քաղաքական ուժի դուռ են թակել և այդպես էլ տեղ չեն գտել նրանց ընտրացուցակներում, կամ նրանք, ովքեր որևէ ընտրացուցակում ընդգրկվել են, բայց զգում են, որ բարիերի տակ են մնալու:
«Մեր դիրքորոշումը հստակ է՝ մեր ժողովուրդը պարապ չէ, որ այս ոճի գործիչների համար ամեն օր խորհրդարան ցրի, ԱԺ շրջափակի, մեր ժողովուրդն ուզում է կայունություն, զարգացող տնտեսություն ունենալ, աշխատել, անվտագն ապրել և սոցիալապես ապահով լինել:«Լուսավոր Հայաստանը» պետք է խորհրդարանում լինի որպես խոշոր միավոր, որպեսզի այլևս թույլ չտա, որ երբևէ հեղափոխության և ցնցումների կարիք լինի, այդ պարագայում համակարգն առողջ աշխատելու է»,- նշեց ԼՀԿ թեկնածուն:
Էդմոն Մարուքյանի դիտարկմամբ՝ այս ընտրություններով հեղափոխության արդյունքները կկապիտալիզացվեն: Նրա խսքով՝ վերից վար պետք է փոխել ամբողջ քաղաքական համակարգը: «Հիմա մենք գնում ենք համակարգ կառուցելու»,- նշեց պատգամավորի թեկնածուն՝ ընդգծելով, որ ԼՀԿ-ում կան համակարգաստեղ մտածողություն ունեցող մարդիկ:
Մանրամասն՝ տեսանյութում:
