Չնայած ամերիկացի ռեժիսոր, դերասան և պրոդյուսեր Ռոբերտ դե Նիրոն արդեն 70 տարեկան է, նա շարունակում է ակտիվորեն նկարահանվել կինոյում, նոր ռեստորաններ և հյուրանոցներ է բացում, ինչպես նաև ղեկավարում է Թրայբեքի կինոփառատոնը:
Սակայն օսկարակիր դերասանը խոստովանել է, որ տարիքի պատճառով չի կարող ավելի հետաքրքիր դերերի հավակնել: Օրինակ՝ դերասանի մոտ ընկեր և հայտնի ռեժիսոր Մարտին Սկորսեզեն արդեն վաղուց նրան գլխավոր դերեր խաղալու չի հրավիրում՝ նախընտրելով երիտասարդ Լեոնարդո Դի Կապրիոյին:
Ներկա պահին դերասանին հաճախ են առաջարկում նախկին մարզիկի կամ ընտանիքի հոր դեր խաղալ: Միայն 2013 թ. նրա մասնակցությամբ 7 ֆիլմ է նկարահանվել:
«Բնականաբար, շատ դերեր արդեն ինձ չեն առաջարկում, քանի որ իմ տարիքն արդեն չի համապատասխանում: Իհարկե, ոչ ոք երեսիս չի ասում. «Դու ծեր ես և չես համապատասխանում»: Ոչ: Բոլորն էլ քաղաքավարի են: Այո-այո տարիքային խտրականությունն առասպել չէ: Կամ, օրինակ, քայլում ես փողոցով, դիմացից գեղեցիկ աղջիկ է գալիս, և ոչ մի հնարավորություն չկա, որ նա քո վրա ուշադրություն կդարձնի: Նա ծերերի վրա չի նայում: Եվ այդ ժամանակ մտածում ես. «Ո՞ւր գնացին իմ երիտասարդ տարիները»: Այսինքն, հիշում եմ իհարկե, թե ինչով եմ զբաղվել անցած օրը, մեկ ամիս կամ մեկ տարի առաջ: Ամեն դեպքում, ժամանակը շատ արագ է անցնում»,- 7 days-ին տված հարցազրույցում ասել է Ռոբերտ դե Նիրոն:
