Շիրակի մարզի Մարալիկ քաղաքում ավելի քան երկու ամիս է պահանջում են համայնքապետ ՀՀԿ-ական Արտակ Գևորգյանի հրաժարականը: Երկու օր է՝ ինչ այդ պահանջով փողոց դուրս եկած մարալիկցիները և հաակից խոշորացված համայնքների բնակիչները կաթվածահար են արել Անիի համայնքապետարանի աշխատանքները: Նրանք փակել են շենքի բոլոր մուտքերը՝ թույլ չտալով աշխատակիցներին ու Արտակ Գևորգյանին մուտք գործել տարածք:
Այս կերպ նրանք արտահայտում են իրենց դժգոհությունը արդեն 14 տարի Մարալիկի քաղաքապետ, համայնքների խոշորացումից հետո էլ 1 տարի Անիի համայնքապետ աշխատող Հանրապետական կուսակցության ներկայացուցիչ Արտակ Գևորգյանի պաշտոնավարման վերաբերյալ:
Ինչպես «Առաջին լրատվական»-ին փոխանցեցին Մարալիկից, այսօր առավոտյան կրկին բողոքի նույն գործողությունը սկսվել է, սակայն մեկ տարբերությամբ: Արտակ Գևորգյանն ու համայնքապետարանի աշխատակիցները փորձել են մուտք գործել շենք, սակայն հավաքված քաղաքացիները թույլ չեն տվել:
Նրանք այս պահին շարունակում են իրենց բողոքի ակցիան և այն տևելու է 72 ժամ, որից հետո, եթե համայնքապետը հրաժարական չներկայացնի, բողոքող քաղաքացիները պատրաստվում են ավելի կոշտ միջոցների դիմել: Թե որոնք են այդ կոշտ միջոցները, հավաքվածները բարձրաձայնել չցանկացան, միայն նշեցին, որ Արտակ Գևորգյանը պետք է հեռանա ու դրա համար իրենք պատրաստ են ամեն ինչի:
