Սխալ է այն կարծիքը, թե ֆուտբոլի աշխարհի առաջնություններում երրորդ տեղի համար հանդիպումը պակաս նշանակալից է, որովհետև իբրև թե այն անհաջողակների համար հոգու մխիթարանք է եզրափակիչում չհայտնվելու համատեքստում:
Այդ կարծիքը հատկապես սխալ է այս առաջնության պարագայում, երբ բրոնզե մեդալների համար պայքարող երկու հավաքականներն էլ լուրջ մոտիվացված էին: Անգլիայի երիտասարդ հավաքականի համար հաղթանակը երրորդ տեղի համար խաղում կլիներ հրաշալի բենեֆիս, իսկ Բելգիայի հավաքականի դեպքում տեղին է խոսել ավելի լուրջ նվաճման մասին: Այս ընտրանին աշխարհի առաջնություններում ամենալավագույն արդյունքը ցույց է տվել հեռավոր 1986թ-ին` զբաղեցնելով միայն չորրորդ հորիզոնականը:
Այս համատեքստում կարելի է արձանագրել, որ ավարտված օրը լիարժեք ֆուտբոլային տոն դարձավ «կարմիր սատանաների» համար: Բելգիայի հավաքականի համար խոստումնալից էր խաղի հենց մեկնարկը. 4-րդ րոպեին խաղի հաշիվը բացեց Թոմաս Մենյեն: Խաղի հաղթական վերջակետը խաղավարտից ութ րոպե առաջ դրեց փորձառու Էդեն Ազարը:
Այսպիսով` Ռուսաստանում ավարտվող ֆուտբոլի աշխարհի առաջնությունում արդեն հայտնի է առաջին մեդալակիրը: Բելգիայի հավաքականի այսօրվա հաղթանակը միանգամայն օրինաչափ էր. նրանք այս առաջնությունում երկրորդ անգամ էին հաղթում Անգլիայի հավաքականին, առաջին անգամ` խմբային խաղում, 1:0 հաշվով: Առհասարակ` ավարտվող առաջնությունում Բելգիայի հավաքականը տպավորիչ ֆուտբոլ խաղաց` հաղթանակ տանելով անցկացված յոթ խաղերից վեցում, որոնցից երկուսը` խոշոր հաշվով: Առաջնության բրոնզե մեդալակիրները խփել են 16, բաց թողել` վեց գնդակ: Բելգիայի ընտրանին այս առաջնության քառորդ եզրափակիչում հետագա պայքարից դուրս է թողել աշխարհի հնգակի չեմպիոն Բրազիլիայի հավաքականին:
Իսկ վաղը տեղի է ունենալու աշխարհի առաջնության եզրափակիչ հանդիպումը. Երևանի ժամանակով 19:00-ին չեմպիոնի կոչումը կվիճարկեն Ֆրանսիայի և Խորվաթիայի հավաքականները:
