Ավստրալիան փակել է աֆղանական Ուրուզգան նահանգի խոշորագույն «Տարինկոտ» ռազմաբազան (զբաղեցվել է 2005-ից) և դուրս բերել երկրից վերջին մարտական ստորաբաժանումները: Ինչպես գրում է The Sydney Morning Herald-ը, այս մասին Սիդնեյում հայտարարել է վարչապետ Թոնի Էբոտը:
Ամփոփելով արդյունքները՝ Ավստրալիայի կառավարության ղեկավարը հայտարարել է, որ երկիրը ստիպված է եղել թանկ վճարել պատերազմի համար, սակայն զուր չէ զոհ տվել:
Նրա խոսքով՝ տարածաշրջանում բարելավել է ենթակառուցվածքը, առավել որակյալ են սկսել աշխատել կառավարական հաստատությունները, բնակչության բժշկական սպասարկումը դարձել է առավել հասանելի, իսկ աղջիկները սկսել են դպրոց գնալ:
Աֆղանստանում ընդամենը 400 ավստրալացի զինծառայող է մնացել, ովքեր կմարզեն ու խորհրդատվություն կտրամադրեն տեղի զինված ուժերին: Բացի այդ, Կանբերան տարեկան 89 մլն դոլար կտրամադրի աֆղանական անվտանգության ուժերի ամրապնդման համար:
Ընդհանուր առմամբ ռազմական արշավին մասնակցել է 25 հազար ավստրալացի զինծառայող: Նրանցից 40-ը զոհվել են, ևս 261-ը լուրջ վնասվածքներ ստացել: Օպերացիան ամենատևական ռազմական արշավն է եղել Ավստրալիայի պատմության մեջ: