Կազանում հունիսի 30-ին տեղի է ունենալու ֆուտբոլի աշխարհի առաջնության 1/8 եզրափակիչ խաղը՝ Արգենտինայի և Ֆրանսիայի հավաքականների միջև։ Արդեն հայտնի է, թե որ հյուրանոցներում են տեղավորելու մրցակիցներին. Ռամադա և Միրաժ հյուրանոցներում։ Առաջինում մնալու է հարավամերիկյան թիմը, միայն թե մի նրբություն կա. շենքի դիմաց Կրիշտիանու Ռոնալդուի գրաֆիտին է։ Այն նկարել են դեռևս 2017 թվականին՝ կոնֆեդերացիայի գավաթի խաղերին ընդառաջ։
Չնայած, որ բոլորը Մեսիին և Ռոնալդուին ոխերիմ մրցակիցներ են համարում, իրենք՝ ֆուտբոլիստները, բազմիցս ժխտել են դա։ Սակայն, ինչպես հաղորդել է իրավիճակին ծանոթ աղբյուրը՝ Մեսին Կազանի իշխանություններից պահանջել է, որ իր նկարը նույնպես նկարեն հյուրանոցի կողքի պատին։
Աղբյուրի խոսքերով՝ քաղաքապետ Իլսուր Մետշինը ներկայումս ուղիներ է փնտրում ֆուտբոլի աստղի խնդրանքը իրականացնելու համար։ Չի բացառվում, որ Ռոնալդուի կողքին շուտով Մեսին կհայտնվի։
