2014թ. հունվարի 1-ից Շվեյցարիայում կսկսվի երգերի ընտրություն, որոնք հավակնում են երկրի նոր հիմնի կոչմանը: Ինչպես Agence France-Presse գործակալությանը հաղորդել է ժյուրիի նախագահ Պյեր Կոխլերը, տեքստով երաժշտական ստեղծագործությունները, որոնցից մեկը կարող է դառնալ ազգային հիմն, ժյուրին կընդունի մինչև հաջորդ տարվա հունիսի 30-ը:
Լավագույն երգի հեղինակը ոչ միայն իր անունը կթողնի երկրի պատմության մեջ, այլ նաև կստանա դրամական մրցանակ՝ 11 հազար դոլարի չափով:
Մրցույթի կազմակերպիչները վստահ են, որ երկրի ներկայիս հիմնը (Շվեյցարական սաղմոս) հնացել է: Բացի այդ, շվեյցարացիների մեծ մասը չգիտեն հիմնի բառերը, որը գրված է որպես սաղմոս:
Մրցույթի կազմակերպիչները հաղթողին որոշելուց հետո մտադիր են նոր հիմնի տեքստը և երաժշտությունը ներկայացնել խորհրդարանին, որից հետո, ինչպես ակնկալվում է, երկրում կանցկացվի հանրաքվե: Կազմակերպիչների տվյալներով՝ դա տեղի կունենա 2016թ.:
