Ազգային ժողովում դեկտեմբերի 11-ի արտահերթ նիստին թեժ քննարկումներ են, որի պատճառը Բնապահպանության նախարար Արամ Հարությունյանի ներկայացրած «Բնապահպանական և բնօգտագործման վճարների մասին» ՀՀ օրենքում փոփոխություններ կատարելու մասին օրինագիծն է: ԱԺ «Ժառանգություն» խմբակցության ղեկավար Զարուհի Փոստանջյանն իր ելույթում ԱԺ նախագահ Հովիկ Աբրահամյանին մեղադրեց բիզնես գործունեություն ծավալելու և սեփական շահերով առաջնորդվելու համար:
«Մեծ գործարարները, ովքեր ունեն լճեր, ձեռնարկատիրական գործունեություն են ծավալում, օրինակ՝ իմ թիկունքում նստած պարոն Աբրահամյանը, ով արտահերթ ելույթով հանդես եկավ ու փորձեց քննադատել օրենքի նախագիծը: Նա այստեղ ունի իր շահը՝ ակնհայտ է: Ակնհայտ է նաև, որ այստեղ փոքր ձեռնարկատերերի շահերն էր ներկայացնում Լյովա Խաչատրյանը. այստեղ էլ է ակնհայտ խտրական մոտեցումը:
Ո՞վ չգիտի, որ ՀՀ-ն իրավական երկիր չէ ու կարող են նրանք դուրս մնալ մրցակցությունից և մեծ տնտեսվարողներին մրցակցությանը դիմանալը հեշտ է, որովհետև նրանք կարող են 300.000 դրամը մուծել խախտումներ կատարելու դեպքում, իսկ փոքրերը, իհարկե, դուրս կմնան»,- ասաց նա՝ նկատելով, որ դա ակնհայտ է:
Ըստ Փոստանջյանի՝ մյուս կողմից էլ ակնհայտ է, որ կառավարությունը, չկարողանալով կազմակերպել իր աշխատանքը, փորձում է այս միջոցով կարգավորել, պատժամիջոցներ կիրառել ու վերահսկել իրավիճակը: Պատգամավորի համոզմամբ՝ պետք է վերացնել մենաշնորհները, ոչ թե նման փորձ կատարել, սանկցիաների միջոցով կատարել հարցը:
«Ես չեմ հավատում, որ սանկցիաները կլուծեն հարցը, որովհետև մեծերը կվճարեն, իսկ փոքրերը դուրս կմնան մրցակցությունից: Ակնհայտ երևում է, թե ինչպես են ատամներով իրենց շահը պահում խորհրդարանում նստած մեծ ձեռնարկատերերը: Պարո՛ն Աբրահամյան, ես Ձեզ խորհուրդ կտայի, որ գոնե դուք արտահերթ ելույթով հանդես չգայիք, ու չմատնեիք մեծ տնտեսվարող սուբյեկտների ախորժակը»,- ասաց նա:
Փոստանջյանը դա բնութագրեց իբրև տգեղ երևույթ, որ հասկանում է՝ հայոց խորհրդարանում այս պահին շահերի բախում է տեղի ունեցել, ու ամեն մեկը ատամներով շահերն է պահում: Պատգամավորն ԱԺ նախագահին խորհուրդ տվեց ատամներով պաշտպանել հասարակության շահը, ոչ թե իր անձնական շահերը:
Լուսանկարը` PanARMENIAN Photo-ի
