«Այս իշխանությունները տապալել են երկրի սահմանադրական կարգը, մեր ժողովրդի արյան ու դիակների վրայով են եկել իշխանության, բռնազավթել ժողովրդի իշխանությունը: Իսկ երբ բռնազավթում են ժողովրդի իշխանությունը, մնացած բոլոր իրավունքներն արդեն խաթարված են»,- «Առաջին լրատվական»-ի հետ զրույցում ասաց ՀԱԿ անդամ Վարդան Մալխասյանը՝ Հայ ազգային կոնգրեսի հրավիրած ՝ Մարդու իրավունքների պաշտպանության միջազգային օրվան նվիրված երթի ընթացքում:
Հարցին՝ ինչո՞ւ ընդդիմադիր ուժերը չեն միացել այսօրվա երթին, միայն համակարգային փոփոխություններ պահանջող ազատամարտիկներն են ու Հայ ազգային կոնգրես կուսակցությունը, Վ. Մալխասյանը պատասխանեց. «Շատ ցավոտ հարց տվեցիք, մինչև բոլոր ուժերը խելքի չգան, չմիավորվեն… մեկն առանձին վերցրած փոքր ուժ է, պետք է կոնսոլիդացվենք: Եթե նրանք իրենց նեղ կուսակցական շահը չեն տեսնում ընդհանուրի շահի մեջ, ուրեմն ձախողված է: Ցանկացած մարդ և կուսակցություն պետք է իր շահը տեսնի ընդհանուրի շահի մեջ:
Կոնգրեսն այսօր հայտարարում է՝ մենք չարիքի, կեղծիքի այս բռնապետությունը պետք է տապալենք, եկեք միավորվենք, բոլորին էլ ասում ենք՝ եկեք միավորվենք՝ բացի Գեղամյանից, Արթուր Բաղդասարյանից և այն մարդկանցից, ովքեր դավաճանելով պաշտոններ ստացան»:
Հարցին՝ այդ կոչը վերաբերո՞ւմ է Գագիկ Ծառուկյանին, ում կուսակցության հետ Կոնգրեսը վերջերս ակտիվորեն համագործակցում է, մեր զրուցակիցը պատասխանեց. «Իհարկե: Նա այնքանով է տարբերվում, որ ուզում է դարձի գալ, թեպետ շատ սխալներ է գործել, բայց եթե արդեն ուզում է դարձի գալ, պետք է թողնենք ապաշխարի և դարձի գա: Օրինակ՝ ինչպես էր, երբ Քրիստոսի ոտքերն անբարոյական աղջիկ էր լվանում, բոլորը զարմանում էին և ասում՝ ինչպե՞ս ես թողնում, նա էլ պատասխանում էր՝ թող դարձի գա, ի՞նչ կլինի»:
Մանրամասները՝ տեսանյութում:
