«25 տարին որոշակի ժամանակ է, կողքից նայողների համար, ասենք` իշխանությունների կամ այլ պետությունների, այնքան ժամանակ է, որ մի տեսակ սառնասրտորեն են նայում»,- «Առաջին լրատվական»-ի հետ զրույցում անդրադառնալով Գյումրիի ավերիչ երկրաշարժի 25-ամյա տարելիցին` ասաց «Շիրակ կենտրոն» հ/կ ղեկավար Վահան Թումասյանը. «Իհարկե, այդ ամենը չես համեմատի այսօրվա հետ, տաբեր երկրների առաջատար մամուլները եկան լուսաբանեցին՝ ի տարբերություն նախորդ տարիների, իհարկե 25 տարին էր` դրա համար: Իսկ քաղաքի բնակիչների համար, անօթևան բնակիչների համար ամեն օր է ցավալի, Շիրակ կենտրոնի համար, մեզ համար ևս ցավալի է, այդ մարդկանց հետ ամեն օր ենք շփվում»:
Նա հավելեց, որ իրենք ամեն օր ապրում են այդ օրը, իրենց համար ամեն օր դեկտեմբերի 7-ն է․ «Իհարկե, այն տարիներին օգնությունը մեծ էր, մարդիկ լիահույս էին, որ Գյումրին ավելի կառուցապատված լինի, բայց 25 տարին սպանեց այդ հույսը, այդ առումով բավականին ծանր վիճակ է հիմա»:
Մեր հարցին` իշխանությունների կողմից կա՞ արդյոք բավարար աջակցություն, Վահան Թումասյանը պատասխանեց․ «Առհասարակ աշխատում եմ իշխանությունների հետ չշփվել, գործ չունենալ, որպեսզի չհիասթափվեմ կյանքից և կարողանամ օգնել: Ոչ միայն աղետի գոտում, այլ հասարակության խնդիրներից այնքան են հեռացել, այնքան անհասանելի են դարձել մարդկանց համար, որ էլ ասելու չէ:
Իրենք տեղյակ չեն` մարդիկ ինչ վիճակում են ապրում, այսօր գերմանական, ֆրանսիական լրատվամիջոցներ եկան լուսաբանեցին, բայց այստեղ՝ սկսած ամենամանր չինովնիկից մինչև նախագահ՝ ծանոթ չեն աղետի գոտու խնդիրներին կամ էլ չեն ցանկանում ծանոթանալ: Նրանք այդ խնդիրները ոչ թե փորձում են լուծել, այլ ջայլամի քաղաքականությամբ զբաղվել, իբրև թե այդ խնդիրները գոյություն չունեն: Իսկ եթե այդ խնդիրները չեն լուծում, դրանք օր օրի խորանում, ավելի շատ բարդություններ են տալիս: Այսօր՝ դեկտեմբերի 7-ին, որոշեցինք գնալ տնակային ավաններ, մարդկանց վառելափայտ, երեխաներին շոր-կոշիկ բաժանեցինք, որպեսզի մի օր մի ժամով մարդկանց շեղենք:
Մենք դա ենք անում, ոչ թե նստենք ու մտածենք՝ ով եկավ աղետի գոտի, ով չեկավ, դրանք արդեն երկրորդական խնդիրներ են, շատ ավելի կարևոր բաներ կան՝ հիվանդ երեխաներ, անօթևան ընտանիքներ և այլն»:
