Եվրոպական միությունը եւ Իրանը պայմանավորվել են համատեղ աշխատանքային խումբ ստեղծել, որը կզբաղվի նավթի առևտրի հարցերով։ Այս մասին հայտարարել է Թեհրանում գտնվող ԵՄ էներգետիկայի հարցերով հանձնակատար Միգել Արիաս Կանետեն։
Նա հստակեցրել է, որ նավթի առևտրի հարցերով աշխատանքային խմբի առաջին հանդիպումը կկայանա հենց այսօր։
«Մենք մտադիր ենք սատարել Իրանին նավթի առևտրի ոլորտում»,-նշել է էներգետիկայի հարցերով հանձնակատարը։
Կանետեի խոսքով՝ ստեղծված կառույցը կօգնի իրականացնել գործարքի հիմնարար բաղադրիչը, որ Իրանի բնակչությունը միջուկային համաձայնագրից օգուտներ ստանա։
Ավելի վաղ Եվրոպական Միության արտաքին գործերի եւ անվտանգության քաղաքականության հարցերով բարձր ներկայացուցիչ Ֆեդերիկա Մոգերինին հայտարարել էր, որ ԵՄ-ն ու Իրանը որոշել են ակտիվացնել տնտեսական համագործակցությունը։ Նույն օրը հայտնի դարձավ, որ ԵՄ-ն որոշել է Իրանի հետ առեւտրում դոլարը փոխարինել եվրոյով։
