Թուրքիայի քրդամետ Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը կոչ է արել երկրի դատավորներին ազատ արձակել քրդամետ կուսակցության՝ բանտում գտնվող նախկին համանախագահ Սելահաթթին Դեմիրթաշին, գրում է Cumhurriyet պարբերականը։
Փայլանը հայտարարել է, որ Դեմիրթաշը ձերբակալվել ու կալանավորվել է հենց երկրի նախագահ Ռեջեփ Թայիփ Էրդողանի հրամանով։
«Այստեղից կոչ եմ անում բոլոր դատավորներին ու դատախազներին․ հունիսի 24-ի ընտրություններից հետո դուք կարող եք ինքներդ դատարանի առաջ կանգնել այսօր չկայացրած որոշումների համար։ Էրդողանը չի շարունակելու մնալ նախագահի պաշտոնում, դուք եք դատվելու», – ասել է Փայլանը։
Հիշեցնենք, որ 2016 թվականի նոյեմբերից բանտում գտնվող Դեմիրթաշի փաստաբաններն արդեն պահանջել են նրա՝ թեկուզ ժամանակավոր ազատ արձակումը նախագահական ընտրությունների նախընտրական քարոզչությանը մասնակցելու համար։
Նշենք, որ Դեմիրթաշը հայտարարել է, որ նախագահ ընտրվելու դեպքում թուրք-հայկական սահմանը կբացվի՝ առանց որևէ նախապայմանի։
