Դեկտեմբերի 1-ը ողջ աշխարհում համարվում է ՁԻԱՀ-ի դեմ պայքարի միջազգային օր: Ինչպես մի շարք երկրներում, այնպես էլ Հայաստանում այս օրը անցկացնում են ՄԻԱՎ վարակի մասին իրազեկող ակիցաներ, ստուգումներ և խորհրդատվություն:
«Հանրային տեղեկատվություն և գիտելիքի կարիք» ՀԿ նախագահ Մամիկոն Հովսեփյանն այսօր լրագրողների հետ հանդիպմանը նշեց, որ արդեն մի քանի տարի է, ինչ Գլոբալ հիմնադրամի ֆինանսավորման շնորհիվ անցկացնում են իրազեկման ակցիաներ՝ հատկապես առավել վտանգի ենթարկված մարդկանց շրջանում: Իրականացվում են պահպանակների տրամադրում, ինֆորմացիոն խորհրդատվություն, հետազոտում: Եթե տվյալ անձի առողջությանը վտանգ է սպառնում, ուղղորդում են նրան՝ բուժումն իրականացնելու համար:
Գլոբալ հիմնադրամի աջակցությամբ ՄԻԱՎ կարգավիճակի մասին տեղեկանալը և հիվանդության հայտնաբերման դեպքում բուժում ստանալը անվճար է, սակայն այս կազմակերպությունը մի քանի տարի անց ավարտելու է իր աշխատանքները Հայաստանում:
Ասուլիսի մյուս բանախոս Դրական մարդկանց հայկական ցանց ՀԿ նախագահ Անահիտ Հարությունյանն ասաց, իրենք վստահ չեն, թե հիմնադրամի հեռանալուց հետո ՀՀ առողջապահության նախարարությունը գումարներ կտրամադրի, որպեսզի հիվանդ մարդիկ բուժվեն. «Բացի ՄԻԱՎ-ից, Հայաստանում հեպատիտ c-ով մեծ վարակվածություն կա, որի վերաբերյալ ոչ մի հստակ վիճակագրություն չկա, ոչ մի միջոց կառավարության կողմից չի տրամադրվում»:
Բանախոսը նշեց, որ հիվանդությունն ունի գաղտնի շրջան, որը կարող է տևել մինչև տասը տարի: Նման ակցիաներն ուղղված են նրան, որ անկախ ռիսկայնությունից՝ մարդիկ պարզեն իրենց ՄԻԱՎ կարգավիճակը:
Ասուլիսին ներկա էր նաև ՁԻԱՀ-ի կանխարգելման հանրապետական կենտրոնի ՁԻԱՀ-ի դեմ պայքարի բաժնի վարիչ Ժանետա Պետրոսյանը, ով ընդգծեց, որ այսօր պետք է մարդկանց միջից կոտրել այն կարծրատիպը, թե հետազոտություն անցնելն արդեն կյանքի վերջ է. «Մի կողմից` մարդիկ իրենց առողջությունը չեն կարևորում, մի մասը վախենում է այս հետազոտությունն անցնել, հնարավոր է՝ կարգավիճակը հայտնի դառնա, և ախտորոշումը լինի կյանքի վերջը»:
Նրա հավաստմամբ՝ ՄԻԱԱՎ-ով վարակված մարդը կարող է բուժվել և իր կյանքն ապրել առողջ, մահանալ մեկ այլ խնդրից, սակայն դրա համար անհրաժեշտ է ժամանակին հետազոտվել:
Նշենք, որ դեկտեմբերի 1-ին Հյուսիսային պողոտայում կանցկացվի ՁԻԱՀ-ի կանխարգելման ակցիա, որի ընթացքում քաղաքացիները 15-20 րոպեի ընթացքում մատից արյուն վերցնելու միջոցով կիմանան իրենց ՄԻԱՎ կարգավիճակը:
Միջոցառումներ կանցկացվեն նաև մարզերում, կկազմակերպվեն համերգներ և ֆորում թատրոններ, իսկ Վանաձորում տեղի կունենա քայլերթ՝ նվիրված ՁԻԱՀ-ի կանխարգելմանը:
ՀՀ-ում ՁԻԱՀ-ի առաջին դեպքը գրանցվել է 1988 թվականին, մինչ այժմ գրանցվել է 1586: Այս տարվա 11 ամիսներին գրանցվել 205 դեպք:
