Ավստրալիայի Գոլդ-Քոսթ քաղաքի վարչակազմը հանրահայտ երգիչ Ջասթին Բիբերին խնդրել է մաքրել հյուրանոցի պատը, որի վրա նա գրաֆիտի էր արել հյուրախաղերի ժամանակ: Այս մասին հայտնում է France Presse-ը:
Կատարվածից վրդովված քաղաքապետ Թոմ Թեյթը հայտարարել է, որ Բիբերի արարքը «շատ հիմար» է, և որ պետք է քաղաք վերադառնա՝ պատկերազարդված պատը մաքրելու համար:
«Կոչ եմ անում նրան քաղաքին վերաբերվել այնպես, ինչպես Գոլդ-Քոսթի երկրպագուներն են վերաբերվել նրան»,- ասել է Թեյթը:
Գործակալության փոխանցմամբ՝ քաղաքապետը կանադացի երգչին է ուղարկել քիմիկատների հավաքածու, որը հնարավորություն կտա նրան մաքրել գրաֆիտին:
Հյուրանոցի պատին արված իր «ստեղծագործության» լուսանկարները Բիբերը հրապարակել էր Instagram սոցցանցում, սակայն երկրպագուները չէին գնահատել նրա արարքը և թողել էին վրդովված մեկնաբանություններ:
Վերջերս համանման դեպք էր տեղի ունեցել Ռիո դե Ժանեյրոյում: Նա կրկին գրաֆիտի էր նկարել պատմական Սան Կոնրադո շրջանի թանկարժեք հյուրանոցներից մեկի պատին:
