Այսօր Երևանում տեղի ունեցավ «Բաց հասարակության հիմնադրամներ-Հայաստան» կազմակերպության և «Բաց հասարակություն Վրաստան» հիմնադրամի կազմակերպած «Վարշավայից դեպի Վիլնյուս. Խաչմերուկներում- Հայաստան և Վրաստան» վերտառությամբ հանրային քննարկումը, որի ժամանակ ներկայացվեցին և քննարկվեցին ԱլԳ ճանապարհային քարտեզի 2012-2013թթ. մշտադիտարկման արդյունքները:
Հայաստանյան զեկույցը բաղկացած էր երեք հատվածներից, որոնք առնչվում էին ՀՀ-ում ընտրական ստանդարտներին, արդարադատության անկախությանը և մամուլի ազատությանը:
Զեկույցի՝ ՀՀ-ում մամուլի ազատության հատվածը ներկայացրեց Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը:
Վերջինս նշեց, որ իշխանության պահպանման համար տոտալ հսկողություն է սահմանված ԶԼՄ-ների բովանդակության վրա, իսկ ոլորտում բարեփոխումներն իրականացվում են միայն մեկ պայմանով, որ դրանք չխոչընդոտեն իշխանության վերարտադրությանը:
Նա ներկայացրեց, թե ինչպիսին է խոսքի ազատության վիճակը հեռուստատեսային ԶԼՄ-ներում, տպագիր մամուլում և առցանց լրատվամիջոցներում: Լևոն Բարսեղյանը չմոռացավ ընդգծել նաև փաստը, որ «Ա1+» և «Նոյան տապան» հեռուստաընկերությունները զրկվել են եթերի իրավունքից:
Նրա խոսքով՝ համեմատաբար ազատ են աշխատում օրաթերթերը, սակայն թերթերի տպաքանակը, ըստ նրա, չի կարող համեմատվել եթերի սպառման հետ: Լևոն Բարսեղյանի կարծիքով՝ նկատվում է նաև «Ֆեյսբուք» սոցիալական ցանցում խոսքի ազատությունը և առցանց լրատվամիջոցների աշխատանքը սահմանափակելու միտում, ինչն անթույլատրելի է:
Նրա գնահատմամբ՝ սա ոլորտին նետված մարտահրավեր է:
Առաջարկում ենք զեկույցին ծանոթանալ տեսանյութի միջոցով:
