Հայ-ռուսական ռազմական համագործակցության հարցը միշտ էլ անհանգստացրել է Վրաստանին և վրաց ժողովրդին. սա շատ նուրբ հարց է: «Առաջին լրատվական»-ի հետ զրույցում նման տեսակետ հայտնեց «Բազմազգ Վրաստան» քաղաքացիական շարժման նախագահ Առնոլդ Ստեփանյանը՝ անդրադառնալով Ռուսաստանի նախագահ Վլադիմիր Պուտինի՝ երեկ Կրեմլում արած այն հայտարարությանը, թե Ռուսաստանը մտադիր է առաջիկայում Հայաստանի հետ հակաօդային պաշտպանության միասնական համակարգ ստեղծել։
Նրա խոսքով՝ ելնելով աշխարհաքաղաքական մի շարք հանգամանքներից՝ նման պայմանավորվածության կյանքի կոչումը ծայրահեղ անցանկալի երևույթ կլինի:
«Տարածաշրջանային կայունության պահպանման տեսակետից սա շատ կարևոր հարց է՝ մանավանդ 2008 թվականի ռուս-վրացական պատերազմից հետո: Չնայած վրացական մամուլի հրապարակումներին, թե պատերազմի օրերին կարող էր կիրառվել Հայաստանում տեղակայված ռուսական ռազմաբազայի զինուժը, նման բան չեղավ: Չգիտեմ՝ դա հայկակա՞ն կողմի հստակ դիրքորոշումն էր, թե՞ Ռուսաստանի որոշումը, սակայն նման բան չպատահեց:
Գյումրիի ռուսական ռազմաբազան արդեն իսկ մեծ անհանգստություն է Վրաստանի համար, ուր մնաց՝ հայ-ռուսական հակաօդային պաշտպանության միասնական համակարգի ստեղծումը:
Ուզում եմ հուսալ, որ այսուհետ ևս միմյանց հանդեպ մեր երկրների պատմական-ավանդական պարտավորությունները կպահպանվեն՝ որքան էլ Հայաստանն ու Վրաստանն այսօր տարբեր աշխարհաքաղաքական պլատֆորմների են հարում»,- ասաց Առնոլդ Ստեփանյանը՝ համոզմունք հայտնելով, որ հայ-ռուսական հակաօդային պաշտպանության միասնական համակարգ ստեղծելու պարագայում կտուժի ինչպես տարածաշրջանային կայունությունը, այնպես էլ հայ-վրացական հարաբերությունները:
Վրացահայ գործչի գնահատմամբ՝ բարիդրացիական հարաբերություններ ունեցող երկրները չեն կարող թիկունքից հարվածել միմյանց:
Հիշեցնենք, որ երեկ Կրեմլում մի շարք ուժային կառույցների բարձրագույն հրամանատարական պաշտոններում նշանակված զինվորականների հետ հանդիպման ժամանակ ՌԴ նախագահ Վլադիմիր Պուտինը հայտարարել էր, որ Ռուսաստանը մտադիր է առաջիկայում Հայաստանի հետ հակաօդային պաշտպանության միասնական համակարգ ստեղծել: