ԱԺ-ում այսօր՝ մարտի 1-ին, տեղի է ունենում ՀՀ 4-րդ նախագահի թեկնածու Արմեն Սարգսյանի ընտրությունը:
«Ելք» խմբակցության պատգամավոր Արարատ Միրզոյանը անիմաստ համարեց դեմ քվեարկելու կոչ անել. «Մի թեկնածու կա՝ ձեր թեկնածուն է: ՀԼԿՄ Կենտկոմի ընտրություններին բնորոշ լուսաճաճանչ, փառապանծ տերմիններով գովեստի սազն առնելն ու գովերգելը մի տեսակ տեղին չէ. երևի պարոն Սարգսյանին էլ սա դուր չի գա»:
Պատգամավորը, դիմելով նախագահի թեկնածու Արմեն Սարգսյանին, նշեց նրա ելույթում եղած բացթողումները. «Խոսեցիք Ղարաբաղյան շարժման մասին, բայց չխոսեցիք դրանից հետո եղած բացթողումների մասին, խոսեցիք կրթության մասին, բայց չխոսեցիք այն մասին, որ կրթության բյուջեն շարունակ նվազում է, խոսեցիք արդար դատարանների մասին՝ չխոսելով ժողովրդավարության մասին»:
Ինչպես նշեց Արարատ Միրզոյանը, Արմեն Սարգսյանը հավակնում է լինել 4-րդ հանրապետության 1-ին նախագահ. «Ես ցավում եմ, բայց էսպես կիսատ 4-րդ հանրապետության 1-ին նախագահ չի կարող լինել»:
Իր խոսքը եզրափակելով՝ պատգամավորն ասաց. «Մենք քաղաքական հակառակորդներ ենք, ես չեմ ողջունում Ձեր առաջադրումը և Ձեզ դեմ եմ քվեարկելու»:
Մանրամասները՝ տեսանյութում:
