Անցյալ ամիս Սիրիայի հյուսիս-արևմուտքի Աֆրինի շրջանում մեկնարկեց Թուրքիայի «Ձիթենու ճյուղ» ռազմական գործողությունը, որը Անկարայի որակմամբ «պայքար է ահաբեկիչների դեմ՝ նկատի ունենալով, ինչպես Սիրիայի քրդերի «Ժողովրդական ինքնապաշտպանության ջոկատներին» (YPG), այնպես էլ՝ Իսլամական պետությանը: Փորձագետների մեծ մասի համոզմամբ՝ Աֆրինում Թուրքիայի գործողությունների թիրախը ոչ թե ահաբեկչության դեմ պայքարն է, այլ քրդերի անկախությունը: Հայաստանից ընդամենը 815 կմ հեռավորության վրա՝ սիրիական փոքրիկ Աֆրինում, այս օրերին մեկտեղվել և հատվել են աշխարհի մի շարք գերտերությունների և ուժային կենտրոնների շահերը. Թեմայի շուրջ «Առաջին Լրատվական»-ը զրուցել է թուրքագետ, ՄԱՀՀԻ-ի ասոցացված փորձագետ Հայկ Գաբրիելյանի հետ:
Մեր զրուցակցի դիտարկմամբ՝ այս պահին Թուրքիան բավականին լուրջ խնդիրներ ունի Աֆրինում իր նպատակներին հասնելու համար և միևնույն ժամանակ մի շարք ներքին խնդիրներ է լուծում Սիրիայի հյուսիսում ռազմական գործողությամբ: «Մասնավորապես, պաշտոնական Անկարան փորձում է տեղի քրդերին դուրս մղել հենց Աֆրինի շրջանից և Եփրատ գետի արևմտյան հատվածից: Բացի այդ Թուրքիան իր ռազմական ներկայությունն է մեծացնում հարևան Սիրիայում»:
Նրա խոսքով՝ Թուրքիան ԱՖրինում ռազմական գործողությունը սկսել է Ռուսաստանի, ինչպես նաև Իրանի լուռ համաձայնությամբ. «ՌԴ-ն իր շահերն է հետապնդում՝ հասկանալով, որ Թուրքիան իրեն կարող է շատ ավելին տալ, քան Սիրիայի քրդերը, և Թուրքիայից կարող է դրա դիմաց շատ ավելի մեծ զիջումներ ստանալ»,-նշեց Գաբրիելյանը:
Անդրադառնալով մամուլում հրապարակված տեղեկություններին այն մասին, որ թուրքական զինյալներից խուսափող քուրդ ապստամբները հատում են հայ-թուրքական սահմանը և հանձնվում Հայաստանի իշխանություններին, թուրքագետը նշեց, որ հասկանալի չէ՝ որ հատվածից են նրանք հատել սահմանը, եթե նման բան ընդհանրապես եղել է:
«Կոչ եմ անում ընդհանրապես նման տեղեկություններ չտարածել մամուլում, եթե անգամ Թուրքիայի քրդերը, PKK-ի զինյալները փախչում գալիս են Հայաստան, քանի որ այդ լուրը մեծ արագությամբ տարածվեց ադրբեջանական մամուլում, վերջինիս միջոցով էլ թուրքական մամուլում, իշխանամետ թերթերում: Անկեղծ ասած սպասում էի, որ Թուրքիայի ԱԳՆ-ն Վրաստանի դեսպանատան միջոցով բողոքի նոտա կհղի Հայաստանին, քանի որ թուրքական կողմի տեսանկյունից ստացվունմ է, որ Հայաստանը դառնում է ահաբեկիչներին հովանավորող երկիր, քանի որ Քրդստանի աշխատավորական կուսակցությունը (PKK) Թուրքիայում ճանաչված է որպես ահաբեկչական խմբավորում»,-նշեց Գաբրիելյանը՝ հավելելով, որ PKK-ին ահաբեկչական են ճանաչել նաև Եվրամիությունը և Միացյալ Նահանգները:
Առավել մանրամասն՝ տեսանյութում.
