Հայ-թուրքական հարաբերությունների կարգավորման հարցը և այդ ուղղությամբ հնարավոր տարբերակներն այս օրերին թուրքական լրատվամիջոցների քննարկման գլխավոր թեման են:
Todays Zaman թուրքական պարբերականը մի վերլուծություն էր ներկայացրել՝ հիշեցնելով, որ հոկտեմբերի կեսին Շվեյցարիա կատարած այցի ընթացքում Թուրքիայի արտգործնախարար Ահմեդ Դավութօղլուն շվեյցարացի քաղաքական գործիչներին ասել է, թե Թուրքիան պատրաստ է նորմալացնել հարաբերությունները Հայաստանի հետ՝ ընդգծելով, որ Հայաստանը պետք է «ազատի Ադրբեջանի օկուպացրած տարածքները»: Ապա թուրքական լրատվամիջոցը, իր աղբյուրների համաձայն, մի տեղեկություն է դրել շրջանառության մեջ, համաձայն որի հայ-թուրքական բանակցությունների արդյունքում Հայաստանը պատրաստակամություն է հայտնել « 7 օկուպացված շրջաններից 5-ն ազատել»:
ԼՂ անկախ պատգամավոր Վահան Բադասյանն «Առաջին լրատվական»-ի հետ զրույցում դա խայտառակություն և ազգային դավաճանություն որակեց՝ պնդելով, որ նման քայլը Ղարաբաղում չեն ընդունի, ավելի ոտքի կկանգնեն և կպայքարեն: Նա հիշեցրեց իր կոչը ՀՀ նախագահ Սերժ Սարգսյանին:
«Եթե նա իրոք խոհեմ գտնվի, հրաժարական կտա, քանի որ իր բոլոր քաղաքական դեգերումները տապալված են, նա այլևս Հայաստանում անելիք չունի: Իսկ երբ ամեն ինչ տապալված է, կա թույլ իշխանություն, յուրաքանչյուր երկիր իր պահանջը կդնի: Բայց պետք է հիշել, որ ունենք հզոր Հայաստան, ունենք հոյակապ ժողովուրդ, որը պատրաստ է տեր կանգնել իր երկրին:
Եթե Սերժը գնա նախապայմանների, դա կլինի սեփական իշխանության պահպանման համար, բայց դա չափանզանց վատ կընկալվի, դավաճանությունից ավելի: Հանրությունը չի հանդուրժի, Արցախում դեմ կկանգնեն, և եթե կանգնեն՝ կկանգնեն»,- ասաց նա՝ եզրափակելով իր խոսքը հետևյալ կերպ, որ նա, ով կհանդգնի մի թիզ հող հանձնելու համաձայնություն տալ, դավաճան է հայ ժողովրդի համար:
Ղարաբաղի «Սոցիալական արդարություն» կուսակցության վարչության անդամ, քաղաքագետ Անուշ Ղալալյանն «Առաջին լրատվական»-ի հետ զրույցում ասաց, որ չկա որևէ փաստացի փաստաթուղթ այն մասին, որ Արցախը լիազորել է Հայաստանին տնօրինել Արցախյան հողերը, ավելին՝ դրանք հանձնել Ադրբեջանին: Ըստ նրա՝ այդ տարածքներն Արցախի սահմանադրությամբ ամրագրված տարածքներ են, և որևէ այլ երկիր իրավունք չունի դրանք տնօրինել:
«Ղարաբաղում չի գտնվի մեկը, որը կողջունի կամ կողմ կլինի նման մտքին, շատ բացասական կընկալվի»,- նկատեց նա:
