Ոչ ստանդարտ չափեր ունեցող մոդել Տարա Լիննը, ով լուսանկարվում է շատ հայտնի ամսագրերի համար, վերջերս իսպանական Elle ամսագրին պատմել է իր բարդ աշխատանքի մասին ողջ ճշմարտությունը: «Դժվար է հագուստը նստեցնել խոշոր չափեր ունեցող կանանց վրա», –խոստովանել է աղջիկը:
Ընդ որում, 50 չափս ունեցող գեղեցկուհին իրեն ընդհանրապես վատ չի զգում, նա զարդարում է Elle France, Vogue Italia, CR Fashion Book և այլ հայտնի հրատարակչությունների շապիկներն ու էջերը: Իսկ ահա իր ավելի նիհար կոլեգաների նկատմամբ նա ավելի հոռետեսորեն է տրամադրված և ասում է, որ «նրանց նիհար մարմիններն օգտագործվում են հագուստը վաճառելու համար»:
Տարան համոզված է, որ plus size տերմինը հնարավորություն է տալիս տարբեր չափերի մարդկանց իրենց համապատասխան հագուստ ընտրել: Նրա կարծիքով՝ շատ կարևոր է, որ հագուստի գովազդներում տարբեր չափսեր ունեցող մոդելներ հանդես գան, և մարդիկ բոլորին նմանվելու զգացողություն չունենան:
Մոդելը հուսով է նաև, որ մոտ ապագայում ոչ ստանդարտ չափեր ունեցող մոդելներն ավելի հաճախ կերևան գովազդային արշավներում և հայտնի ամսագրերի շապիկներին:
