Եգիպտոսի մշակութային ժառանգության նախարարությունը իսրայելական առցանց աճուրդներից մեկում հայտնաբերել է ավելի քան 100 հնագույն նմուշներ, որոնք անօրինական կերպով դուրս էին բերվել Եգիպտոսի տարածքից՝ հաղորդում է Art Daily-ն:
110 նմուշների մի մասն արդեն վաճառվել է, սակայն եգիպտական կողմին հաջողվել է հասնել աճուրդի դադարեցմանը: Իսրայելի իշխանությունները ստուգում են անցկացրել և կարգադրել են Կահիրեին վերադարձնել 90 հնագիտական նմուշները, քանի որ աճուրդի ադմինիստրացիայից չեն ստացել լոտերի օրինական ծագումը հաստատող փաստաթղթեր:
Եգիպտոսը մտադիր է Իսրայելի իշխանություններին խնդրել շարունակել հետաքննությունը՝ վերադարձնելու համար արդեն վաճառված ապրանքները:
2013թ. հոկտեմբերին Եգիպտոսի մշակութային ժառանգության նախարարությունը հայտարարել է, որ կարողացել է համաձայնագիր կնքել eBay կայքի ադմինիստրացիայի հետ՝ կայքի միջոցով եգիպտական գողացված հնությունների վաճառքն արգելելու համար:
Ամենայն հավանականությամբ, գողացված արժեքավոր իրերը Եգիպտոսից անօրինական դուրս են բերվել անկարգություններից մեկի ժամանակ:
