Մինչև 2100 թ. ամբողջ աշխարհի մարդկությունն ամեն օր շուրջ 100 միլիոն տոննա աղբ կթափի, ինչը շուրջ 3 անգամ գերազանցում է ներկայիս ցուցանիշը: Նման եզրահանգման են եկել Օնտարիո համալսարանի դոցենտ Դենիել Հարնվեգը, Տորոնտոյի համալսարանի պրոֆեսոր Քրիս Քենեսին և թափոնների հետ աշխատող ընկերության խորհրդական Փերինզա Բհադա Տատան: Նրանք իրենց հետազոտությունը հրապարակել են Nature ամսագրում:
Իհարկե, այդ թափոնների մի մասը վերամշակվում է, սակայն մեծ մասը համալրում է քաղաքային աղբանոցները, որոնք գնալով շատանում են: Գիտնականները, որոնք մտահոգված են ստեղծված իրավիճակով, նշում են, որ ունևոր մարդիկ ավելի շատ աղբ են թափում, մինչդեռ աղքատներն ավելի քիչ մթերք են գնում և օգտագործում:
Զեկույցում գիտնականները նշում են, որ մարդկության և երկրագնդի համար ամենամեծ աղետն աղբի քանակը չէ, քանի որ կարելի է աղբը վերամշակել կամ այլ միջոցներ ձեռնարկել այդ խնդրի դեմ պայքարելու համար: Բնապահպաններին ավելի շատ մտահոգում է այն փաստը, որ աղբի շատացումը նպաստում է ջերմոցային գազերի, ազոտի կոնցենտրացիայի և պլաստիկե մասերի մեծացմանը Համաշխարհային օվկիանոսի ջրերում:
Հետազոտողները նշում են, որ իրենց թվերը վերջնական չեն, մարդիկ կարող են բարելավել կամ ավելի վատացնել իրավիճակը:
