«Ոստիկանական գործողությունները ես այսպես կգնահատեմ՝ մերկ ձեռքեր փայտերի դեմ: Սա այն է, ինչ ես տեսել եմ»,- «Առաջին լրատվական»-ի հետ զրույցում ասաց նախկին ՆԳ նախարար, «Հանրապետություն» կուսակցության քաղխորհրդի անդամ Սուրեն Աբրահամյանը:
«Էն, ինչ որ ես տեսել եմ, համենայնդեպս՝ ոստիկանական ուժերի կողմից, ինչպես նախկինում, հիվանդագին, դաժան դրսևորում չէր: Ոստիկանության գործողությունները, ազնիվ լինենք, տարբեր էին: Նախկինում անհասկանալի դաժանություն էր դրսևորվում. դա տեսել ենք մարտի 1-ին, ապրիլի 12-ին: Այս անգամ ես ոչինչ չտեսա, նույնիսկ դուբինկաներ, ռետինե մահակներ չտեսա, հակառակ այն բանին, որ նրանք տվյալ պարագայում ամեն ինչ օգտագործելու իրավունք ունեին: Բայց, համենայնդեպս, նրանք մերկ ձեռքերով էին»,- ավելացրեց Աբրահամյանը:
Ինչ վերաբերում է կատարվածի քաղաքական գնահատականին, ապա Սուրեն Աբրահամյանը ցավ հայտնեց Շանթ Հարությունյանի համար՝ հավելելով, որ եթե իրավիճակի հիմնական պատասխանատուն, նրա խոսքով՝ ԱԱԾ-ն, ժամանակին կանխեր ծրագրվածը, չէինք ունենա այն պատկերը, որն առկա է հիմա՝ բազմաթիվ ձերբակալվածներ, վիրավորներ, տուժածներ:
«Մարդկայնորեն շատ եմ ափսոսում Շանթի համար, ազնվագույն տղա է, բայց իշխանությունները պետք է իմանային նրա ով լինելը և պատկերացնեին երբեմն նրա անհավասարակշիռ գործողությունների տրամաբանությունը: Խոսքս հատկապես վերաբերում է ոչ թե ոստիկանությանը, այլ Ազգային անվտանգության ծառայությանը, որի շունչը ես ընդհանրապես չտեսա:
Այս գործողություններում ամենամեծ պատասխանատուն ԱԱԾ-ն է: Ի՞նչ կապ ունեն ոստիկանական ծառայությունները, երբ նման կոչերի և գործողությունների պարագայում ամբողջ պատասխանատվությունը ԱԱԾ-ի վրա է: Նամանավանդ, որ Շանթը մի քանի օր առաջ հայտարարել էր այդ ամենի մասին: Այդ ամենը կանխել էր պետք»:
Անդրադառնալով հնչող կարծիքին, թե ակցիայի շարքերում մեծաթիվ քաղաքացիական հագուստով ոստիկան- սադրիչներ են եղել, Աբրահամյանն արձագանքեց. «Շանթի ելույթների պարագայում էլ ի՞նչ սադրանք, այդ կարգի գործողություններին ոստիկանների կողմից լրացուցիչ սադրանք պետք չէր»:
Լուսանկարը՝ PanARMENIAN Photo-ի
