ԵԱՀԿ-ն մտադիր է վերականգնել իր ներկայացուցչությունը Վրաստանում: Այս մասին RIA Novosti-ին հայտարարել է կազմակերպության գլխավոր քարտուղար Լամբերտո Զանյերը:
Վրաստանում ԵԱՀԿ ներկայացուցչությունն իր աշխատանքը դադարեցրել է 2009թ.: Կազմակերպության մշտական խորհուրդն այդպես էլ չկարողացավ համաձայնության գալ Վրաստանում ԵԱՀԿ դիտորդական առաքելության աշխատանքի շարունակության վերաբերյալ:
«Ընտրություններից (խորհրդարանական) սկսած՝ մեր համագործակցությունը երկրի իշխանությունների հետ պահպանվում է: Օրինակ՝ մոտ մեկ ամիս առաջ Վրաստանի արտգործնախարարը ելույթ է ունեցել Վիեննայում՝ ԵԱՀԿ խորհրդում»,- ասել է գլխավոր քարտուղարը:
Նրա խոսքով՝ չնայած դրան, ԵԱՀԿ-ն կարող է Վրաստանում տեղի ունեցող փոփոխություններին հետևել միայն կողքից՝ ներկայացուցչություն չունենալու պատճառով:
«Ես, սակայն, նախատեսում են հաջորդ տարի այցելել Վրաստան: Զրույցի հիմնական թեմաներից մեկը լինելու է ԵԱՀԿ ներկայացուցչության վերականգնումը: Դա թույլ կտա մեզ ավելի արդյունավետ իրագործել նախագծեր տարածաշրջանում»,- ասել է Զանյերը:
