ԱՄՆ բանակի շտաբերի պետերի միացյալ կոմիտեի նախագահ, գեներալ Ջոզեֆ Դանֆորդը հայտարարել է, որ Ռուսաստանը վերջին շրջանում արդիականացրել է իր բանակը, ներառյալ միջուկային զենքը, ինչպես նաև մշակում է կիբերպատերազմ վարելու գործիքներ։ Վերջին ներդրումներին նայելով՝ դա դժվար չէ հասկանալ, ասել է նա Բրյուսելում՝ ՆԱՏՕ-ի համաժողովի ժամանակ, փոխանցում է Պենտագոնի մամլո ծառայությունը։
Նրա խոսքով՝ Ռուսաստանը հանդիսանում է գլխավոր սպառնալիք մայրցամաքի համար և դրա սահմաններից դուրս, և ՆԱՏՕ-ն ստեղծում է բոլոր հնարավորությունները նրան զսպելու համար։
Դանֆորդն ասել է նաև, որ անհրաժեշտ է նայել Ռուսաստանի վարքին, պետք է հիշել Վրաստանի և Ուկրաինայի դեպքերը։
Դանֆորդը նշել է, որ ՆԱՏՕ-ի երկրները պաշտպանվելու իրավունք ունեն՝ անկախ այն բանից, թե ինչպիսի ներխուժման մասին է խոսքը՝ ռազմական հարձակմա՞ն թե՞ ոչ ստանդարտ գործողությունների, ներառյալ տեղեկատվական գործունեության, տնտեսական հարկադրանքի կամ քաղաքական ազդեցության։ Նրա խոսքով՝ դա հանդիսանում է ինքնիշխանության խախտում։
