Ռուսաստանն ԱՄՆ-ի և Ֆրանսիայի հետ միասին որպես ԵԱՀԿ Մինսկի խմբի համանախագահ անում է ամեն ինչ Լեռնային Ղարաբաղի հակամարտության կարգավորման համար պայմաններ ստեղծելու համար` հայտարարել է ՌԴ արտգործնախարար Սերգեյ Լավրովը Մոսկվայում կայացած մամուլի ասուլիսի ժամանակ: «Ռուսաստանի Դաշնությունը չի կարող ունենալ այդ խնդրի կարգավորման կոնկրետ ծրագրեր, որովհետև խնդիրը կարող են լուծել միայն իրենք՝ կողմերը: Ռուսաստանն ԱՄՆ-ի, Ֆրանսիայի հետ միասին որպես ԵԱՀԿ Մինսկի խմբի համանախագահ անում է ամեն բան, որպեսզի պայմաններ ստեղծի այդ կարգավորման համար»,- ասել է Լավրովը: Ռուսաստանի արտգործնախարարի այսօրվա ասուլիսի ղարաբաղյան հատվածը լրիվ ներդաշնակ է տարածաշրջանային նրա վերջին այցի համատեքստին:
Մոսկվան այս պահին ԼՂ հարցում պատրաստ չէ գնալ քայլերի, Ադրբեջանի և Թուրքիայի հետ սեպարատ համաձայնությունների, որոնք կհանգեցնեն 2016-ի ապրիլյան սցենարի կրկնությանը: Իհարկե, անկեղծ լինենք, մեզ համար բարենպաստ այս համատեքստի ձևավորման հարցում հայկական դիվանագիտության ներդրումը նվազագույն է: Ռուսաստանի և Ադրբեջանի հարաբերություններն այս պահին ճգնաժամային են և հատկապես էներգետիկ ոլորտում Բաքվի ու Մոսկվայի մրցակցությունն ակնհայտ է:
Մյուս կողմից` ակնհայտ է, որ Մինսկի խմբի համանախագահության ձևաչափը մնում է միջազգային բացառիկ հարթակը, որտեղ Ռուսաստանի և Արևմուտքի հարաբերությունները չեն ենթարկվում Սառը պատերազմի տրամաբանությանը: Սա պատուհան է, որի միջոցով Մոսկվան պահպանում է Արևմուտքի հետ հարաբերվելու, երկխոսելու, նույնիսկ հարաբերությունները կարգավորելու հնարավորությունը: Ռուսաստանի համար սա ավելի սկզբունքային նշանակություն ունի, քան` ԼՂ հարցում միակողմանի նախաձեռնությունները, որոնք ռիսկային են և տարածաշրջանում կարող են վտանգել ռուսական շահերը` այնպես, ինչպես դա տեղի ունեցավ 2016-ի ապրիլին: Այսօր Մոսկվայում Լավրովը ընդգծել է համանախագահության միասնականությունն ու ամբողջականությունը, ինչը միանգամայն համահունչ է այն շեշտադրումներին, որոնք հնչում են Երևանից:
Լավրովի դիրքորոշումն անուղղակի պատասխան է Բաքվին, որն անընդհատ շանտաժի միջոցով Մոսկվային փորձում է հակել սեպարատ համաձայնությունների` ստանալով նոր պատերազմի քարտ-բլանշ:
Այս պահին Մոսկվան պատրաստ չէ դառնալ ուժային այն կենտրոնը, որը «պատերազմի թուղթ» կտրամադրի Ադրբեջանին, մանավանդ, որ Լավրովն այսօր տողատակով ակնարկել է նաև առաջնագծում վստահության մեխանիզմների ներդրման անհրաժեշտության մասին. «Կարծում եմ, որ այժմ կարևոր կլիներ ձեռնարկել լրացուցիչ քայլեր, որպեսզի շփման գծում, այնուամենայնիվ, իրավիճակը հանդարտվի: Դա կօգներ նաև անցնել քաղաքական կարգավորման»: ԼՂ խնդրում հայկական կողմի համար ստեղծվել է բարենպաստ միջազգային իրավա-քաղաքական համատեքստ:
Խիստ էական է, որ Հայաստանն` արդյունավետ արտաքին քաղաքականությամբ, կարողանա ինստիտուցիոնալիզացնել բարենպաստ ստատուս-քվոն` Ադրբեջանի միջազգային մեկուսացման ֆոնին:
