«Առինջ մոլ» տոնավաճառի աշխատակիցները սպասում են աշխատանքային օրերի սկսվելուն, որպեսզի հասկանան իրենց անելիքները։ Մինչ այդ, սակայն, քննարկում են տարբեր սցենարներ՝ պայքարի տարբերակներ։
«Մեր քննարկումները ավարտման փուլում են, սակայն լսել ենք, որ վարչապետն ինչ-որ փոփոխություններ է ուզում արած լինի։ Պետք է տեսնենք, հասկանանք՝ դրանք ինչ փոփոխություններ են, ինչպես են լինելու, նոր արդեն ամսի 10-12-ին հստակ կորոշենք մեր անելիքները»,- «Առաջին լրատվական»-ի հետ զրույցում ասաց «Համերաշխություն» ՀԿ նախագահ Արմեն Ներսիսյանը՝ հավելելով, որ դրանից բացի՝ առաջիկայում պատրաստվում է հանդիպել նաև ԱԺ պատգամավորների հետ։
«Բայց մենք որոշել ենք, եթե մեզ չկպնեն, մեզ նեղություն չտան, ժողովրդի հետ պայմանավորվել ենք, որ իրենք նորմալ հարկերը կստանան։ Իսկ եթե հանկարծ մի անգամ էլ գան ու մեզ կպնեն, մենք նորից կըմբոստանանք։ Եթե հիմա մարդիկ ներքին պայմանավորվածության արդյունքում տանում հարկերը մուծում են, հլը մի բան էլ ավելի, իրենք հանգիստ պետք է մնան, մեզ տեռորի չենթարկեն։ Բայց եթե այդքանից հետո էլ գան ու անհանգստացնեն, աղմուկն ավելի մեծ է լինելու»,- նշեց մեր զրուցակիցը։
Արմեն Ներսիսյանը նշեց, որ ինքը հակված էր կոմպրոմիսի գնալ հարկային մարմինների հետ։ Դրա համար ինքը անձամբ պրպտել և կազմել էր այն ընկերությունների, անհատների ցուցակը, ովքեր քիչ հարկ են վճարում։ Նրանց կանչել, զրուցել են, որ պետք է նորմալ հարկեր վճարեն, որպեսզի իրենց պատճառով մյուսները չտուժեն։
«Բացատրեցինք, որ եթե նորմալ աշխատեն, 1.5 տոկոսի փաստաթուղթ ունենան, վաճառքի ժամանակ ՀԴՄ խփեն, տուգանքները, հարկային տեռորը կվերանան, մենք էլ նորմալ կաշխատենք։ 4-5 շուկայի ժողովրդի հետ խոսել եմ։ Ոնց որ մարդիկ հասկացան ինձ, իմ խորհուրդը։ Հուսանք՝ այդպես էլ կանեն։ Ոնց որ թե շուկաներում հանգիստ էր, շատ քիչ մարդ է տուգանվել»,- ասաց Ներսիսյանը՝ հավելելով, որ հունվարի 12-ին արդեն ամեն ինչ պարզ կլինի։
