Շիրակի պետական համալսարանում կրքերը չեն հանդարտվում։ Համալսարանի դասախոս, գյումրեցի քաղաքագետ Գագիկ Համբարյանն ահազանգում է՝ ռեկտոր Սահակ Մինասյանի միանձնյա որոշմամբ՝ նոյեմբերի 29-ին բուհից վտարվել է յոթ ուսանող՝ բոլորն էլ նախազորակոչային պատրաստություն բաժնից: Այդ ուսանողներն են՝ ՆԶՊ 2-րդից 3-րդ կուրս փոխադրված Ուստյան Զավենը, Ղզրոյան Նարեկը, Ալեյան Սեյրանը, Բարսեղյան Հայկը, Մկրտչյան Դավիթը և ՆԶՊ 1-ինից 2-րդ կուրս փոխադրված Բերնեցյան Խաչատուրը և Գասպարյան Վաղարշակը:
«Առաջին լրատվական»-ի հետ զրույցում Գագիկ Համբարյանը նշում է՝ պատճառը մեկն է. «Այդ բաժինը՝ իբրև թե բարեփոխումների անվան տակ դուրս է բերվել նախկին ֆիզիկական կուլտուրայի ֆակուլտետից ու առանձին ամբիոն է դարձել, հիմա այդ բաժինը չունի դեկան։ Այսինքն՝ մեխանիկորեն ստացվում է, որ այդ բաժնի դեկանի պաշտոնակատարը ռեկտորն է։ Բայց մոտ մեկ սեմեստր ամեն ինչ բարձիթողի վիճակում է, ուսանողները տեղյակ չեն, որ պարտքեր ունեն։ Արդյունքը եղավ այն, որ 7 ուսանող՝ ունենալով ակադեմիական պարտք, այդ մասին չեն իմացել ու դուրս են մնացել համալսարանից»,- մանրամասնեց Համբարյանը։
Գագիկ Համբարյանը նշում է՝ Սահակ Մինասյանը բացարձակ օրենքին չի տիրապետում. «Նման իրավիճակում պետք է հանձնաժողով ձևավորվի և ուսանողները փուլ առ փուլ պարտքերը մարեն։ Այս ամենը տեղի չի ունեցել»։
Դուրս մնացած ուսանողները նշում են, որ իրենք նախապես տեղյակ չեն եղել, և դուրս մնալու որոշումն անակնկալ է եղել։ Ըստ կանոնակարգի՝ բուհից հեռացման հրամանները տրվում է քննաշրջանի, ակադեմիական պարտքերի մարման արդյունքների ամփոփումից հետո 5 աշխատանքային օրվա ընթացքում, որի մասին ուսանողը նախապես տեղեկացվում է։ Այսինքն` ուսանողներն իրենց վտարման մասին պետք է տեղեկանային սեպտեմբերի 20-ից ոչ ուշ: Հետագա անելիքների մասին ուսանողներն առայժմ որոշում չունեն։ Մեզ հետ զրույցում ուսանողներից մեկը փոխանցեց միայն, որ ինքն այդ որոշումից զարմացած է. «Ակադեմիական պարտքը եղել է «Հոգեբանություն» առարկայից, բայց որ ենթակա եմ հեռացման՝ այդ մասին չեմ իմացել»,- փոխանցեց նա։
Ուսանողներից մեկի հայրը՝ Գևորգ Ղզրոյանը, «Առաջին լրատվական»-ի հետ զրույցում իր վրդովմունքը հայտենց. «Թքած ունեմ այդ համալսարանի վրա, նույնիսկ փոշմանել եմ, որ տղաս էդ ինստիտուտ ա ընդունվել»,- եզրափակեց նա։
Ընդգծենք նաև, որ դուրս մնացած ուսանողները մի քանի անգամ համապատասխան ամբիոնում ասել են, որ «Հոգեբանություն» առարկայից պարտք ունեն։ Այդ առարկայի դասախոսը, սակայն, երկու ամիս է հիվանդ է՝ աշխատանքի չի հաճախում։ Եվ ուսանողներին տրվել է ընդամնեը այդ պատասխանը, իսկ համալսարանից հեռացնելու «անակնկալը» 7 ուսանողներն իմացել են միայն նոյեմբերի վերջին։
