«Բոլորիս ցանկությունն է, որ Հայաստանում շատ դղյակներ լինեն»,- լրագրողների հետ զրույցում ասաց ԱԺ ՀՀԿ խմբակցության ղեկավար Վահրամ Բաղդասարյանը՝ հավելելով, թե չպետք է վատ ընդունվեն լավ կառույցները, այլ պետք է ուսումնասիրվեն՝ դրանց կառուցման հիմքերը համապատասխան հայտագրերի՞ են, թե՞ ոչ:
Լրագրողների դիտարկմանը, թե այսպիսի աղքատ երկրում որքանո՞վ է նորմալ նման դղյակների կառուցումը, Վահրամ Բաղդասարյանը պատասխանեց. «Հավասար դաշտ չի կարող լինել բոլորի համար՝ կան և հարուստներ, և աղքատներ, ուղղակի պետք է ուսումնասիրվեն այդ հարուստների հարստացման ճանապարհները»: Նա առաջարկեց բոլորին նայել հավասար դաշտում և չառանձնացնել մի կտորը:
Դիտարկմանը՝ պետական լծակները միշտ եղել են ձեր իշխանության ձեռքում, Վահրամ Բաղդասարյանը հակադարձեց. «Նախ՝ ձեր չէ, մեր, և հաջորդը՝ կառուցողների մեծ մասը որևէ կապ չունեն իշխանության և քաղաքականության հետ»: ՀՀԿ խմբակցության ղեկավարը նշեց, որ ինքը շինարարության սիրահար է և ընդհանրապես ուրիշի ունեցվածքը չի հաշվում:
«Ես իհարկե չեմ համապատասխանում ձեր նշած տրամաչափին, բայց 16 տարեկանից կառուցում եմ և զբաղվել եմ բիզնեսով»,- ասաց Վահրամ Բաղդասարյանը:
Մանրամասները՝ տեսանյութում:
