«Մանչեսթեր Յունայթեդը» երկրորդ պարտությունը կրեց Անգլիայի Պրեմիեր լիգայում: 11-րդ տուրի «Չելսիի» հետ հանդիպումից հետո բրիտանական մամուլը խիստ քննադատության է ենթարկել գլխավոր մարզիչ Ժոզե Մոուրինյոյին, կենտրոնական հարձակվող Ռոմելու Լուկակուին և կիսապաշտպան Հենրիխ Մխիթարյանին:
Շատերի պնդմամբ՝ Լուկակուի և Մխիթարյանի խաղային ճգնաժամը շարունակ խորանում է, իսկ Մոուրինյոյին չի հաջողվում լուծումներ գտնել: Մրցաշրջանի սկզբում թե՛ Մխիթարյանը և թե՛ Լուկակուն փայլուն խաղ էին ցուցադրում, և նույնիսկ խոսվում էր, որ «Յունայթեդի» առջևի գիծն ուժեղագույնն է Անգլիայում: Ի՞նչ է տեղի ունեցել «Յունայթեդում»:
Ֆուտբոլային շատ փորձագետներ առջևի գծում առկա ճգնաժամը կապում են Պոլ Պոգբայի բացակայության հետ: «Մխիթարյանի խաղի անկման պատճառը Պոգբան է: Նրա բացակայության հետևանքով գոլային երաշտ է նաև Լուկակուի մոտ: Մեկնարկային երեք խաղերում Մխիթարյանը 5 գոլային փոխանցում կատարեց, իսկ վերջին շրջանում նրա խաղը չի ստացվում: Մխիթարյանին չի հաջողվում օգնել Լուկակուին հաջողության հասնել: Այդուհանդերձ, այս ֆուտբոլիստներին չի կարելի մեղադրել: Կրկին անգամ ուզում եմ ասել, որ պատճառը Պոգբայի բացակայությունն է: Թե՛ Մխիթարյանը և թե՛ Լուկակուն աջակցության կարիք ունեն: Կարծում եմ՝ ամեն ինչ կկարգավորվի, երբ Պոգբան վերադառնա: Այս ֆուտբոլիստը միավորում է թիմը: Հարկավոր է մի փոքր էլ համբերել»,- ասել էր «Յունայթեդի» նախկին կիսապաշտպան Փոլ Սքոուլզը:
Վերջինիս հայտարարությունը ինչ-որ տեղ իրատեսական է, քանզի իրադարձությունների զարգացումները դա են վկայում: Երեկվա պարտությունից հետո «Յունայթեդի» երկրպագուները ֆորումներում և սոցիալական կայքերում խստորեն քննադատելով Մխիթարյանին՝ նրա անհաջող ելույթների շարքը կապում են Հայաստանի ազգային հավաքականի հետ:
«Պոգբայի բացակայությունը այնքան էլ լուրջ պատճառ չէ: Մխիթարյանի թիկունքում խաղում են Էրերայի և Մատիչի պես տղաներ: Մխիթարյանը մրցաշրջանը փայլուն սկսեց՝ կատարելով 5 գոլային փոխանցում: Նա մասին խոսում էր Բրիտանիայի ֆուտբոլային հասարակությունը: Անկումը սկսվեց այն բանից հետո, երբ Մխիթարյանը միացավ Հայաստանի ազգային հավաքականին: Աշխարհի առաջնության ընտրական փուլում Մխիթարյանի հավաքականը խայտառակ ֆուտբոլ խաղաց: Հայաստանը Եվրոպայի ամենաթույլ հավաքականներից է և պարտվում է 1:6, 0:5 հաշիվներով: Այս հավաքականում խաղալով՝ ցանկացած նորմալ ֆուտբոլիստ հոգեբանական խնդիրների առաջ կկանգնի: Նվաստացնող պարտություններն ու քննադատությունները թողնում են իրենց հետևանքը: Հայկական մղձավանջից հետո Միկին չէր կարող վերադառնալ Անգլիա և շարունակեր խաղալ նույն ոգով: Վերջին երկու ամսվա ընթացքում Մխիթարյանը ստիպված է եղել 2 անգամ մեկնել Հայաստան: Վստահ եմ, որ սա է հայ ֆուտբոլիստի անհաջողությունների պատճառը «Մանչեսթեր Յունայթեդում»:
Շատերը կհակադարձեն՝ նշելով, որ մյուս ֆուտբոլիստները ևս միանում են իրենց երկրների հավաքականներին: Այո, միանում են: Կրկին նշեմ, որ ի տարբերություն մյուս երկրների՝ Հայաստանը պարտվում է խայտառակ հաշիվներով: Պրեմիեր լիգայում հանդես եկող լեգեոներների զգալի մասը ելույթ են ունենում բարձրակարգ հավաքականներում»,- թվիթերյան իր էջում կարծիք է հայտնել «Մանչեսթեր Յունայթեդի» 67-ամյա երկրպագու Քևին Յոհանսոնը, որը 9 տարեկանից իր սիրելի թիմի կողքին է:
«Չելսիի» հետ հանդիպումից հետո Մխիթարյանը պետք է ժամաներ Հայաստան՝ միանալու մեր ազգային հավաքականին, որը նոյեմբերի 9-ին Վազգեն Սարգսյանի անվան «Հանրապետական» մարզադաշտում ընկերական հանդիպում է անցկացնելու Բելառուսի հետ: Նոյեմբերի 13-ին էլ Հայաստանը կրկին Երևանում կմրցի Կիպրոսի ազգային թիմի հետ: Այս պահին դժվար է ասել՝ Հայաստանի հավաքականին միանալը դրակա՞ն, թե՞ բացասական ազդեցություն կունենա Մխիթարյանի վրա: Պետք չէ բացառել, որ կարգով ոչ այնքան բարձր հավաքականների դեմ հաջող խաղ ցուցադրելով՝ մեր ավագը բարձր տրամադրությամբ կվերադառնա Անգլիա և կվերագտնի խաղը «Մանչեսթեր Յունայթեդում»:
Անգլիայի Պրեմիեր լիգայում «Մանչեսթեր Յունայթեդը» հաջորդ հանդիպումն անցկացնելու է նոյեմբերի 18-ին՝ սեփական հարկի տակ մրցելով «Նյուքասլի» հետ:
