Օգոստոսի 22-ին Հայաստանի ազգային հավաքականի գլխավոր մարզիչ Արթուր Պետրոսյանը հրապարակել էր Հայաստանի առաջնությունում հանդեղ եկող այն ֆուտբոլիստների անունները, ովքեր հրավեր էին ստացել մասնակցելու Աշխարհի 2018 թ. առաջնության ընտրական փուլի Ռումինիա-Հայաստան և Հայաստան-Դանիա հանդիպումների նախապատրաստական հավաքին: Հրավիրվածների թվում էր նաև «Շիրակի» դարպասապահ Անատոլի Այվազովը:
Հաշվի առնելով, որ Անատոլի Այվազովը հրաժարվել է մասնակցել նախապատրաստական հավաքին և հանդես գալ Հայաստանի ազգային հավաքականի կազմում, հավաքականի մարզչական շտաբը շտապ կերպով հավաքական է հրավիրել «Գանձասար-Կապանի» դարպասապահ Գրիգոր Մելիքսեթյանին: Ազգային հավաքականի մարզական հավաքը կսկսվի վաղը՝ օգոստոսի 28-ին, հայտնում է ՀՖՖ պաշտոնական կայքը:
Նշենք, որ Մելիքսեթյանը փորձառու դարպասապահ է և առաջիկա հանդիպումներում մեր հավաքականի դարպասը պաշտպանելու ամենաօպիտմալ թեկնածուն է: Միլիքսեթյանին ազգային հավաքականի դարպասը վստահելու հարցին «Առաջին լրատվկականն» անդրադարձել էր դեռևս օգոստոսի 17-ին, երբ Արթուր Պետրոսյանի ցուցակից այս դարպասապահը դուրս էր մնացել:
