Չնայած «Ժառանգություն» կուսակցության հայտարարությանը, որ նախօրեին «ՌԴ Անվտանգության դաշնային ծառայությունը խոչընդոտել է «Ժառանգության» քարոզչական խմբի գործունեությունը Սյունիքի թիվ 38 ընտրատարածքում, որի կազմում եղել են Սյունիքի թիվ 38 ընտրատարածքում «Ժառանգության» կողմից որպես ԱԺ պատգամավորության թեկնածու առաջադրված Սամվել Հայրապետյանը, ԱԺ պատգամավոր Զարուհի Փոստանջյանը և ուրիշներ, ՀՔԾ-ն չի պատրաստվում վարույթ ընդունել ու քննել այդ գործը:
ՀՔԾ մամուլի խոսնակ Միքայել Ահարոնյանը մեր հարցին ի պատասխան` երեկ ասաց, որ Հատուկ քննչական ծառայության մասին ՀՀ օրենքի 4-րդ հոդվածով նաև պատգամավորների կողմից կատարված հանցագործություններն են քննվում ՀՔԾ-ում: «ԱԺ պատգամավոր Զարուհի Փոստանջյանը հանցագործություն չի կատարել և այս դեպքում քրեական գործի նախաքննությունը չպետք է ՀՔԾ-ն իրականացնի, այս պահին այն քննում է այլ քննչական մարմին»,- ասաց Ահարոնյանը: ՀՔԾ խոսնակը չբացառեց, որ հնարավոր է ոստիկանությունը կզբաղվի գործով կամ ռուսական զինվորական քննչական մարմինը: «Ըստ ձեր թերթի տեղեկությունների` այս պահին այն քննվում է ոստիկանությունում, գուցե հենց ոստիկանությունում էլ քրեական գործ հարուցվի և կատարվի նախաքննություն»:
Մեր հստակեցմանը, թե այսինքն` ՀՔԾ-ն չի՞ պատրաստվում քննել այդ գործը, խոսնակը պատասխանեց. «Ոչ թե ՀՔԾ-ն չի պատրաստվում, այլ այս գործը ՀՔԾ-ի սուբյեկտում չէ: ԱԺ պատգամավորը հանցագործություն չի կատարել, հետևաբար քննությունը պետք է իրականացնի այլ քննչական մարմին»: Մեր հաջորդ հարցին` ռուս սահմանապահների արարքը չի՞ դիտվում որպես ընտրական գործընթացի խոչընդոտում ու այդ դեպքում ՀՔԾ-ն չպե՞տք է քննի գործը, Ահարոնյանը պատասխանեց. «Հատուկ քննչական ծառայությունն իրականացնում է Հայաստանի Հանրապետության քրեական դատավարության օրենսգրքով նախատեսված` օրենսդիր, գործադիր և դատական իշխանության մարմինների ղեկավար աշխատողների, պետական հատուկ ծառայություն իրականացնող անձանց, այդ թվում` նաև պատգամավորների իրենց պաշտոնեական դիրքի կապակցությամբ հանցակցությամբ կամ նրանց կատարած հանցագործությունների, ինչպես նաև ընտրական գործընթացների հետ կապված քրեական գործերով նախաքննություն: Հատկանշական եմ համարում նշել, որ անհրաժեշտության դեպքում ՀՀ գլխավոր դատախազը կարող է քննչական այլ մարմինների քննիչների վարույթից վերցնել և Հատուկ քննչական ծառայության քննիչների վարույթին հանձնել քրեական գործեր, որոնք առնչվում են սույն մասում թվարկված պաշտոնատար անձանց հանցակցությամբ կամ նրանց կատարած հանցագործություններին, կամ որոնցով այդ անձինք ճանաչված են որպես տուժող»:
Նշենք, որ ռուս սահմանապահների և «Ժառանգության» պատգամավորի ու պատգամավորի թեկնածուի միջադեպը քննում է Մեղրիի ոստիկանությունը: Մեղրիի ոստիկանապետ Հակոբ Խաչատրյանը «Առաջին լրատվական»-ի հետ զրույցում ասաց. «Առայժմ հետաքննություն է գնում, նյութեր են նախապատրաստվում դեպքի առթիվ, հետո կորոշվի արդեն դատաքննությո՞ւն կլինի, թե՞ հետաքննությունով կգնա, առայժմ հոդված չկա»: Մեր հարցին` հետագայում հնարավո՞ր է գործը տեղափոխվի ռուսական զինվորական քննչական մարմին, Մեղրիի ոստիկանապետը պատասխանեց. «Շատ հնարավոր է»:
Պատգամավոր Զարուհի Փոստանջյանը, ով միջադեպի կապակցությամբ ոստիկանություն է դիմել, մեր հարցին` ինչպիսի՞ն կլինի արձագանքը, եթե ոստիկանությունը որոշի գործը փոխանցել ռուսական զինվորական քննչական մարմին, պատասխանեց. «Մենք համապատասխան միջնորդություններով, դիմումներով հանդես կգանք: Մենք էլ մեր դիրքորոշումը կհայտնենք: Ես ակնկալում են ՀՀ իրավապահ մարմինների կողմից մեր` ՀՀ ստանձնած պարտականությունների, մեր կողմից ընդունված Սահմանադրության և օրենքների հարգում: Տեսնենք, թե ինչպես կվարվի ՀՀ ոստիկանությունը: Տեսնենք, թե ինչպիսի գործառույթներ է իրականացնելու Մեղրիի ոստիկանությունը: Երբ որ որոշում կկայացվի փոխանցելու մեկ այլ մարմնի, կլինի դա ՀՔԾ-ն կամ այլ ծառայություն, ըստ դրա մենք մեր արձագանքը կհնչեցնենք: Ես էլ եմ կարծում, որ պետք չէ փոխանցել, քանի որ դա տեղի է ունեցել Հայաստանի Հանրապետության տարածքում` Լիճք գյուղի հարակից տարածքի մայրուղում»:
«Մենք դիտարկում ենք այս միջադեպը որպես կոպիտ արտաքին միջամտություն ՀՀ ներքաղաքական գործընթացներին, որը տեղի է ունենում ՀՀ իշխանությունների՝ Հանրապետական կուսակցության և անձամբ դե ֆակտո նախագահ Սերժ Սարգսյանի թողտվությամբ, եթե ոչ անմիջական մեղսակցությամբ»,- հայտարարել է «Ժառանգությունը»` հավելելով. «Այն ևս մեկ անգամ ի ցույց դրեց ընտրությունները կեղծած և իշխանությունը բռնազավթած խմբակի անկարողությունը ապահովելու Հայաստանի Հանրապետության ինքնիշխանությունը»:
Իր հեթին ռուսական կայազորը միջադեպի հրահրման մեջ մեղադրել է ԱԺ պատգամավոր Զարուհի Փոստանջյանին. «Փոստանջյանի փաստաթղթերի ստուգման ընթացքում վերջինս ներկայացրել է պատգամավորի վկայականը և կոպիտ կերպով բացատրություններ է պահանջել: Սահմանապահի կողմից կանգնեցնելու վերաբերյալ բացատրությունների տրամադրումից հետո Զ. Ա. Փոստանջյանն ու իր ուղեկցող անձինք իրենց դրսևորել են հանդուգն կերպով, փորձել են սադրել հակաիրավական գործողություններ, հրապարակայնորեն տեսանկարահանում էին սահմանապահ ծառայություն իրականացնողներին: Ի հակառակ պատգամավորի պնդումների` սահմանապահ ծառայության աշխատակիցները տեսանկարահանման սարքը չեն կոտրել:
…Այնուամենայնիվ, Զ. Ա. Փոստանջյանը և նրան ուղեկցող անձինք մտադրված փորձում էին նոր կոնֆլիկտ հրահրել` վիրավորելով սահմանապահներին»,- հայտարարել են ռուս սահմանապահները:
