Նավթը թանկանում է, հետևաբար թանկանում է նաև բնական գազը: Այս տրամաբանությամբ Ռուսաստանը, կարծես թե, մտադիր է թանկացնել կապույտ վառելիքը:
Վերջին շրջանում Լիբիայում նավթի արդյունահանման կրճատումը, ինչպես նաև մտավախությունը, որ ԱՄՆ-ն կարող է ռազմական գործողություն սկսել Սիրիայում, հանգեցրել են նավթի գների կտրուկ բարձրացման: Երբ ԱՄՆ-ն ակնարկեց, որ հրաժարվում է ռազմական գործողություններից, նավթի գները իջան` 2.4-2.6 տոկոսով (ըստ մակնիշների), բայց Լիբիայի պակաս արդյունահման պատճառով դեռ բարձր են: Ըստ ԱՄՆ տվյալի նավթի մատակարարման խափանումներն օգոստոսին կազմել են օրական 2.7 մլն բարել:
Այս դինամիկայի և նորությունների ֆոնին, Ռուսաստանն արդեն բարձրացնում է գազի գինը Բելառուսի համար: Ռուսական գազը այս երկրի համար թանկացել է` 1000խմ համար 163 դոլարից դառնալով 175 դոլար: Ըստ РИА «Новости»-ի, այս մասին հայտարարել է Բելառուսի փոխվարչապետ Վլադիմիր Սեմաշկոն: Նա այս հայտարարությունն արել է Գազպրոմի նախագահ Ալեքսեյ Միլլերի հետ հանդիպումից հետո:
Անցած տարի Բելառուսը ռուսական գազ էր ստանում 1000 խմ-ն 165.6 դոլարով, այժմ գինը 163 դոլարից ցածր է: Ըստ Բելառուսի փոխվարչապետի մինչև 175 դոլար թանկացումը, շատ աննշան է:
Իհարկե, թանկացումն աննշան է, եթե հաշվի առնենք, որ Բելառուսը միակ երկիրն է, որ այդքան էժան ռուսական գազ է ստանում: Այստեղ թանկացումը մոտ 12 դոլար է կամ մոտ 7.4 տոկոս` 1000 խմ հաշվով և սա այն դեպքում, երբ Բելառուսն ունի արտոնյալ կարգավիճակ այլ երկրների համեմատ: Այսինքն, եթե այս երկրում փաստացի գազի գինը բարձրանա, ուրեմն թանկացում անհապաղ սպասվում է ռուսական գազ սպառող բոլոր երկրներին, և այստեղ խոսքն արդեն ավելի մեծ թվերի մասին է:
Հայաստանը բացառություն չի լինի: Բելառուսի համար գազի թանկացման դեպքում, այն կթանկանա նաև Հայաստանի համար, և համեմատաբար ավելի շատ, քանի որ Բելառուսը միակ երկիրն է, որն ազատված է ռուսական գազի արտահանման հարկից: Հայաստանն իհարկե արտահանման հարկից ազատված չէ, և նույնիսկ Մաքսային միություն մտնելու դեպքում այս պայմանի մասին չի էլ խոսվում: Հայաստանը Մաքսային միություն մտնում է գազի մասին մեկ հույսով` «անփոփոխ գին», բայց խաղի կանոնները, եթե փոխվում են արտոնյալ Բելառուսի համար, դրանք զգալիորեն կփոխվեն նաև Հայաստանի համար:
Նույնիսկ, եթե արտահանման հարկի գոյության հանգամանքը հաշվի չառնենք և պարզ հաշվարկենք, թե քանի տոկոսով է գազը թանկացել Բելառուսի համար և նույն տոկոսով բարձրացնենք Հայաստանի համար գազի գինը, ապա 1000 խմ համար ստացվում է մոտ 290 դոլար: Այսինքն` 7.4 տոկոսով թանկացում, ինչը նոր շղթայով կարող է հանգեցնել կոմունալ վճարների բարձրացման և տարբեր ապրանքատեսակների թանկացման:
Հիշեցնենք, ապրիլի 1-ից Հայաստան ներմուծվող գազն արդեն մեկ անգամ թանկացել է` 1000 խմ համար 180 դոլարից դառնալով 270 դոլար: