«Ալ-Ջազիրա» կատարական հեռուստաալիքը միջազգային դատարաններ հայցեր կներկայացնի Եգիպտոսի իշխանությունների դեմ՝ իր լրագրողներին ձերբակալելու և նրանց վրա հարձակում գործելու համար: Այս մասին հաղորդում է France-Presse գործակալությունը՝ վկայակոչելով փաստաբաններին:
«Ալ-Ջազիրա»-ի ներկայացուցիչները հայտարարել են, որ Եգիպտոսի նախագահ Մուհամմադ Մուրսիին իշխանությունից հեռացնելուց հետո ուժայինները ձերբակալել են հեռուստաալիքի շատ լրագրողների՝ առանց մեղադրանք ներկայացնելու կամ այնպիսի մեղադրանքներով, որոնք ունեն քաղաքական դրդապատճառ: Բացի այդ, հեռուստաալիքը զինվորականներին և ոստիկանությանը մեղադրում է լրագրողների վրա հարձակվելու, «Ալ-Ջազիրա»-ի գրասենյակը փակելու և հեռարձակվող ազդանշանների խլացման մեջ:
Ինչպես նշվում է հաղորդագրության մեջ, հեռուստաալիքի ղեկավարությունը մասնագետներ է վարձել Carter-Ruck իրավաբանական ընկերությունից, որպեսզի վերջիններս հայցեր ներկայացնեն միջազգային դատարաններ և դիմեն համապատասխան միջազգային կառույցներին, այդ թվում՝ ՄԱԿ-ին:
