Sports.ru կայքի հաղորդմամբ` երեկ Լոնդոնի «Ուեմբլի» մարզադաշտում կայացած Չեմպիոնների լիգայի 2010/11 մրցաշրջանի եզրափակիչ հանդիպման 54-րդ րոպեին «Բարսելոնա»-ի արգենտինացի հարձակվող Լիոնել Մեսսին իր թիմի երկրորդ գնդակն ուղարկեց «Մանչեսթեր Յունայթեդ»-ի դարպասը, որով և կրկնեց միանգամից մի քանի ռմբարկուական ռեկորդներ:
Այդ գոլով Մեսսին հավասարվեց Չեմպիոնների լիգայի փլեյ-օֆֆ փուլում 18-ական գնդակ խփած իսպանացի Ռաուլին ու ուկրաինացի Անդրեյ Շևչենկոյին:
Բացի այդ, դրանով Մեսսին կրկնեց մեկ մրցաշրջանում իսպանական ակումբների համար ռեկորդային համարվող Մադրիդի «Ռեալ»-ի ֆուտբոլիստ Կրիշտիանու Ռոնալդուի` այս մրցաշրջանում ցույց տված ցուցանիշը` 53 գոլ:
Մեսսին կրկնեց նաև Չեմպիոնների լիգայի մեկ մրցաշրջանում խփած գոլերի քանակով հոլանդացի գոլահար Ռուուդ վան Նիստելռոյի ռեկորդը` 12 գոլ:
Ի դեպ, Մեսսին ցայժմ 9 հանդիպում էր անցկացրել մառախլապատ Ալբիոնում և ոչ մի անգամ չէր դարձել գոլի հեղինակ: Փաստորեն, 10-րդ փորձը պսակվեց հաջողությամբ:
