«Կառավարության հիմնական կորիզը անփոփոխ չի մնա, կլինեն փոփոխություններ, ենթադրում եմ, որ կարող է մի քանի նախարարների հարց վերանայվել, այդ թվում նույնիսկ այն նախարարների, որոնք նշանակվել են վերջին կառավարությունում: Առնվազն մի քանի նախարարներ կարող են փոխվել, որովհետև Կարեն Կարապետյանը շատ օբյեկտիվ է, նա ծանր աշխատանքային բեռ է վերցրել, և իրեն պետք են այնպիսի թիմակիցներ, որոնք կարող են կրել այդ բեռը և արդյունավետ կերպով առաջ գնալ»,- «Առաջին լրատվական»- ի հետ զրույցում այս կարծիքը հայտնեց Գործատուների միության նախագահ Գագիկ Մակարյանը՝ հավելելով, որ կառավարության ղեկավարը չի ցանկանա կորցնել այն վստահությունը, որը ձևավորել է, իսկ դրա համար թիմը կարևոր է:
Գ. Մակարյանի խոսքով՝ տարածաշրջանայնին երկրներից ամենավատ ցուցանիշներն ունի Հայաստանը՝ աղքատության, գործազրկության մակարդակն այստեղ ամենաբարձրն են, իսկ տնտեսական աճն՝ ամենացածրերից մեկը:
Նրա կարծիքով՝ Հայաստանում առաջին հերթին պետք է երկու կարևորագույն խնդիր լուծել՝ նվազեցնել աղքատության և գործազրկության մակարդակը: Մակարյանի կարծիքով՝ խնդիրների լուծման լավագույն ճանապարհն այն է, որ բոլորին պետք է հավասար վերաբերվել: Նրա խոսքով՝ հավասար վերաբերվելու լծակները կա կառավարության ձեռքում և կամքը ևս դրսևորվում է:
Մանրամասները՝ տեսանյութում:
