Վայոց ձորն ու Սյունիքն ընդգրկող թիվ 12 ընտրատարածքում ՀՀԿ ռեյտինգային ցուցակով առաջադրված Աշոտ Արսենյանը իր կուսակցության ղեկավարի հորդորներից անկախ՝ բավական կոշտ քարոզարշավ է անցկացնում: Այս օրերին որքան մոտենում էր քարոզարշավի ավարտը, նրա վերաբերմունքն ավելի էր կոշտանում: Մեզ պատմեցին, որ նա շրջելով համայնքներում՝ գյուղապետերից հետաքրքրվում է, թե գյուղում որքան ընտրող կա, ապա հարցնում է, թե հանրաքվեի ժամանակ որքան ընտրող է մասնակցել ընտրությանը, և որոշ հաշվարկ անելուց հետո գյուղապետին կոնկրետ թիվ է ասում, որ այդքան ձայն պետք է ապահովի իր համար, այլապես «լավ չի լինի»:
Նախօրեին նա այցելել է Վայք քաղաքի գյուղերից մեկը, գյուղացիները Արսենյանին ներկայացրել են, որ գյուղում ջրի խնդիր ունեն, և որ տարիներ շարունակ այդ խնդիրը չի լուծվում: Արսենյանը գյուղապետի ներկայացուցչից հետաքրքրվել է, թե քանի ընտրող կա գյուղում: Ստանալով պատասխանը, որ ընտրողների թիվը չի գերազանցում 150-ը, Արսենյանը հայտարարել է, որ 100 ձայն պետք է ապահովի իր համար, այլապես գյուղը «առհասարակ կչորացնի», և հեռացել է:
Նույն ոճով Արսենյանը խոսել է նաև Վայքի և մյուս քաղաքների հիմնարկների աշխատակիցների հետ: Նա բոլորին զգուշացնում է, որ ով համարձակվի իրեն չընտրել, կարող է ընտրության հաջորդ օրը ներկայացնել աշխատանքից ազատման դիմումը: Նման զգուշացում Աշոտ Արսենյանը արել է նաև Վայքի ճանբաժնի աշխատակիցներին: