«Շատ ոգևորված եմ, և դա գալիս է մեր ժողովրդից, ամբողջ քարոզարշավի ընթացքում շատերն են ասել՝ ուրախ ենք, որ «Ելք» դաշինքը կա, որ ընդդիմությունը միավորվել է և այլընտրանք ստեղծել, եթե հաշվեմ այդ մարդկանց թիվը, «Ելք» դաշինքը առաջին տեղում կլինի: Ամենօրյա քարոզարշավից հոգնելը, արևից այրվելը, մեր ձայնը կտրվելը փոխլրացվում են քաղաքացիների ջերմ խոսքերով և մեզ սատարելու պատրաստակամությամբ: Մարդիկ միանում են մեզ՝ ասելով՝ ելք կա»,- «Առաջին լրատվական»- ի հետ զրուցում ասաց ԱԺ պատգամավոր, ԼՀԿ նախագահ, «Ելք» դաշինքի համամասնական ցուցակը գլխավորող պատգամավորության թեկնածու Էդմոն Մարուքյանը՝ հույս հայտնելով, որ այս անգամ քաղաքացիները օգտվելու են հնարավորությունից՝ գնալու են ընտրության և քվեարկելու են «Ելք» դաշինքի օգտին:
Անդրադառնալով դիտարկմանը, որ խմբագրությունը բազմաթիվ ահազանգեր է ստանում ապօրինությունների, ընտրակաշառքների մասին, որոնք իրականցվում են ՀՀԿ-ի և ԲՀԿ-ի՝ «Ծառուկյան» դաշինքի ներկայացուցիչների կողմից, Էդմոն Մարուքյանը նշեց, որ իրենք անակնկալի չեն եկել, ի սկզբանե գիտեին, որ նրանք միմյանց այլընտրանք չեն, նույն համակարգի մասերն են՝ աջ և ձախ կողմերը: Կա «Ելք» դաշինք, որը ռեալ հնարավորություններ ունի փոփոխություններ իրականացնելու:
Մարուքյանի խոսքով՝ բացատրական աշխատանքը մեծ դեր է խաղում հիասթափված քաղաքացիներին հասկացնելու հարցում, որ իրավիճակից կա ելք՝ գնացե՛ք, մերժե՛ք նրանց, ումից հիասթափվել եք, ձեր ձայնը տվեք «Ելք դաշինքին և փոխե՛ք համակարգը:
«Մենք 25 օր շարունակ գյուղեգյուղ, տնետուն քարոզարշավ ենք իրականացրել: Մեր ռեսուրսը մեր ձայնալարերն էին, մենք Հ1-ի եթերից օգտվել ենք 2 րոպե և մի քանի րոպե «Կենտրոն»- ի եթերից՝ դա էլ մեր քաղաքացիների հանգանակություններով,- նշեց Էդմոն Մարուքյանը՝ հավելելով, որ փող բաժանելը թույլատրված է ՀՀԿ-ին և «Ծառուկյան» դաշինք»-ին. «Քվոտավորված բաշխել են իրար մեջ: Իսկ մենք ասում ենք՝ ՀՀ քաղաքացին գին չունի»:
Մանրամասները՝ տեսանյութում: