ՀՅԴ մամլո դիվանը հաղորդագրություն է տարածել, որով տեղեկացնում է, որ օգոստոսի 24-ից 26-ը Երևանում տեղի է ունեցել ՀՅԴ մարմինների ներկայացուցիչների ընդլայնված խորհրդաժողով։ Համահայկական այս միջոցառմանը մասնակցել են Հայրենիքի և արտերկրի կուսակցական մարմինների և շրջանների ներկայացուցիչներ և հրավիրյալներ։ ՀՅԴ Բյուրոյի նախաձեռնած միջոցառման նպատակն էր քննել կազմակերպական խնդիրներ, հայաստանամերձ տարածաշրջանի կացությունը, ՀՀ ներքին քաղաքական վիճակը, Հայաստան-Սփյուռք հարաբերությունների հարցեր։
Խորհրդաժողովն անդրադարձավ հայության և հայոց պետականության առջև ծառացած խնդիրներին և նոր մարտահրավերներին։
Շեշտվել է, որ իր օրակարգային հիմնահարցերին համարժեքորեն արձագանքելու համար ՀՅ Դաշնակցությունը պետք է ներդնի հավելյալ ջանքեր, հանդես գա համակուսակցական ամբողջական ներուժով։
Խորհրդաժողովը արձանագրեց, որ կազմակերպական-կարգապահական հարցերի լուծման հիմնական միջոցը գործն է։
Նոր ժամանակներին և իրողություններին համաքայլ ընթանալու համար անհրաժեշտ է շարունակաբար հստակեցնել մարտավարական անելիքները, առավել ճկուն և արդյունավետ դարձնել գործելաոճը, առավել արդյունավետ կիրառել ժամանակակից տեխնոլոգիական հնարավորությունները։
Քննելով Հայաստանի ներքաղաքական, սոցիալ-տնտեսական և բարոյա-հոգեբանական վիճակը` խորհրդաժողովը մատնանշեց մի շարք բացասական երևույթներ, որոնք մտահոգիչ են հայոց պետականության համար։ Շեշտվեց մասնավորապես արտագաղթի խնդիրը, որն ազգային անվտանգությանը սպառնացող հիմնահարց է։ Այս գործընթացը կասեցնելու համար անհրաժեշտ նկատվեց, որ պետությունը որդեգրի արտագաղթի պատճառները վերացնող սոցիալ-տնտեսական և այլ բնույթի համալիր ծրագիր։ ՀՅԴ Հայաստանի կազմակերպությունը մշակել է նման ծրագրի համար իր առաջարկների փաթեթը, որը կներկայացվի հանրությանը։
Քննելով Հայաստանամերձ տարածաշրջանի կացությունը` խորհրդաժողովը հաստատել է.
– Տարածաշրջանում տեղի են ունենում բախտորոշ գործընթացներ, որոնք հանգեցնելու են գլոբալ փոփոխությունների։ Այս փոփոխություններին ենթակա է նաև հարավկովկասյան շրջանը՝ նոր մարտահրավերների առջև կանգնեցնելով մեր երկիրը։
– Հայաստանի որդեգրած արտաքին քաղաքականությունը ներկայում ենթակա է փորձության։ Մեր պետականությունը գտնվում է Ռուսաստանի և Արևմուտքի միջև նոր հավասարակշռության կայացման շեմին։
– Առկա մարտահրավերները դիմագրավելու համար Հայաստանի Հանրապետությունը պետք է ամրապնդվի ներքնապես, միատեղի համայն հայության ներուժը, հստակեցնի և վարի նպատակային ու ակտիվ արտաքին քաղաքականություն։
– Խորհրդաժողովը արձանագրել է, որ ՀՅԴ-ն չի հանդուրժի որևէ ոտնձգություն ԼՂՀ պետականության և բնակչության անվտանգության դեմ։ Այս տեսանկյունից կարևոր է ԼՂՀ միջազգային ճանաչման գործընթացին նոր թափ տալը։
– Ցեղասպանության 100-րդ տարելիցը առիթ պետք է ծառայի ուժեղացնելու Հայ Դատի ուղղությամբ իրականացվող աշխատանքները, բանաձևելու նոր հանգրվանի շեմին հայության պահանջատիրական թիրախները և ընդլայնելու Հայ Դատի ուղղությամբ տարվող աշխատանքների բովանդակությունն ու աշխարհագրությունը։
– Կարևորելով քաղաքական փոխհարաբերությունների առաջնահերթությունները` Հայաստանը պետք է ձգտի բազմակողմ տնտեսական-քաղաքական կապերի՝ ապահովելով իր համար անկախ քաղաքականության երաշխիքներ։
– Խորհրդաժողովը քննարկեց Միջին Արևելքի երկրներում տեղի ունեցող զարգացումներն ու տեղի հայության և ի մասնավորի սիրիահայության վերաբերող հարցերը։ Սիրիահայության խնդիրը, պետական, ազգային և կուսակցական առումով մեզ համար մնում է հիմնական առաջնահերթություն։ Սիրիահայության նյութական ու տնտեսական ծանր կացությունը թելադրում է օժանդակության ապահովման խնդիրը դիտել որպես ամենօրյա և տևական աշխատանք։ Միաժամանակ հայության վտանգված հատվածի բազմակողմ հիմնահարցերը լուծելու նպատակով անհրաժեշտ է թափ հաղորդել երկրների կառավարությունների և միջազգային կազմակերպությունների հետ աշխատանքին։
Հայաստանի ու Սփյուռքի ամբողջական համարկումը տևական գործընթաց է, որ կարելի է անխոչընդոտ առաջ տանել` կենտրոնանալով դրական ձեռքբերումների և երկուստեք հստակեցված թիրախների վրա։
Խորհրդաժողովը հաստատել է, որ Հայությանն ու Հայաստանին ծառայության համար կուսակցության հզորացումը Հարենիքում և Սփյուռքում մնում է առաջնահերթություն, որի ուղղությամբ անհրաժեշտ է ձեռնարկել համապատասխան քայլեր։