Օլիմպիական խաղերի կրկնակի չեմպիոն, 2016 թվականի Ռուսաստանի լավագույն մարզիկ ճանաչված սուսերամարտիկ Յանա Եգորյանի՝ «Էքսպրես գազետա» պարբերականին տված աղմկահարույց հարցազրույցի շուրջ կրքերը էլ ավելի են բորբոքվում:
Հիշեցնենք. հրապարակման համաձայն՝ Եգորյանը, անդրադառնալով աշխարհաքաղաքական լարված իրավիճակին, մասնավորապես նշել էր. «Ապրում ենք այնպիսի հասարակությունում, որում մարդիկ սովորել են հոտի բնազդին։ Դեպքեր գիտեմ, երբ երկու հարևան երկրների սուսերամարտիկները երկար տարիներ ընկերություն են արել, իսկ հիմա ատում են միմյանց։ Դա հիմարություն է։ Ամեն ինչ որոշում են քաղաքական գործիչները, իսկ տուժում են հասարակ մարդիկ: Ես, սակայն, կարծում եմ, որ յուրաքանչյուր մարդ պետք է իր կարծիքն ունենա։ Օրինակ՝ ես ազգությամբ հայուհի եմ: Այնպես է ստացվել, որ ես բազմաթիվ ընկերներ ունեմ Ադրբեջանից, և թքած ունեմ, որ Հայաստանն Ադրբեջանի հետ ինչ-որ խնդիր ունի բարձր մակարդակներում։ Ում հետ ցանկանում եմ՝ նրա հետ էլ ընկերություն եմ անելու»։
Հարցազրույցում կար անդրադարձ նաև Եգորյանի և Ռուսաստանի հավաքականի սուսերամարտիկ Տիմուր Սաֆինի միջև սիրավեպի մասին: Մասնավորապես, հրապարակումը վերնագրված էր «Սեքսուալ սուսերամարտիկ Յանա Եգորյանը՝ «Ինսթագրամում» հրապարակված բաց լուսանկարների մասին», և նշված էր, որ Եգորյանի և Սաֆինի սիրավեպը ծաղկուն շրջանում է: Հարցազրույցից օրեր անց Եգորյանը հերքեց թե՛ սիրավեպի մասին և թե՛ հայ-ադրբեջանական հարաբերությունների մասով իր կողմից արված հայտարարությունները:
«Սիրելիներս, ծիծաղը՝ ծիծաղ, բայց հիմա ուղղակի ցանկանում եմ լաց լինել: Ես և Տիմուր Սաֆինը պարզապես լավ ընկերներ ենք: Նա, ով ինձնից հարցազրույց է վերցրել… Հուսով եմ՝ չեմ հանդիպի նրան, այլապես սուսերս կկեղտոտվի… Նման հոդվածները փչացնում են մարդկային հարաբերությունները: Տիմուրն իր անձնական կյանքն ունի, ես՝ իմ: Դեղին մամուլ, այլ բան չեմ կարող ասել»,- «Ինսթագրամում» գրել էր Եգորյանը:
Վերջինս news.am-ի թղթակցի հետ զրույցում անդրադարձել էր նաև Ադրբեջանի հետ Հայաստանի հարաբերությունների վերաբերյալ դիտարկմանը: «Ես այդպես չեմ ասել: Լրագրողները ցանկանում են վարկանիշ և գրում են այդպես, որպեսզի մարդիկ կարդան»,- նշել էր մարզուհին:
Աղմկահարույց հարցազրույցի հեղինակը Ռուսաստանում սկանդալային լրագրողի համբավ ձեռք բերած Սերգեյ Դադիգինն է: Նրա հրապարակումները մասնավորապես վերաբերում են մարզիկների անձնական կյանքին, որոնք վարկաբեկող լինելուց բացի՝ շարունակ հերքվում են: «Իգոր Նետոն արտամուսնական կապից ծնված երեխա ունի», «Չեպալովան աղջիկ է ունեցել ոչ թե ամուսնու, այլ սիրեկանի համար», «Ում համար է մերկացել հայտնի հոկեյիստի կինը»՝ նման վերնագրերով հրապարակումներով Դադիգինը տարիներ շարունակ կոնֆլիկտային իրավիճակներում է հայտնվում՝ այս կերպ փորձելով ճանաչում ձեռք բերել:
Վերջերս Դադիգինը անդրադարձել էր նաև հանրահայտ թենիսիստուհի Սերենա Ուիլյամսի և հայ գործարար Ալեքսիս Օհանյանի հարաբերություններին: Հրապարակումն ունի «Ամերիկուհի Ուիլյամսը հայկական ուտեստներ կպատրաստի» վերնագիրը: Նշենք, որ հոդվածն ամբողջովին թարգմանված է Daily Mail պարբերականից, որտեղ հայկական ուտեստներ պատրաստելու մասին խոսք անգամ չկա: Ավելին՝ «Էքսպրես գազետայի» թղթակիցը՝ նշելով, որ Ուիլյամսի փեսացուի հայրը հայ է, փորձել է նրան ներկայացնել որպես «պապայի տղա». «Կյանքում ամենադժվար պահերին ես հույսս դնում եմ ծնողներիս վրա: Կյանքում դա ամենակարևորն է»:
Դադիգինը խոսքով՝ Օհանյանը նման հայտարարություն արել է հարցազրույցներից մեկում՝ չնշելով, սակայն, թե երբ և որ լրատվական միջոցի հետ զրույցում է ասել հայազգի գործարարը: Նման էժանագին հնարքներով հոդվածագիրը արհեստականորեն փորձել է հնչեղություն հաղորդել հրապարակմանը՝ այնտեղ զետեղելով հորինված հայտարարություններ:
Թյուր տեղեկություն տարածելու համար բազմաթիվ անգամ մարզիկները նրա դեմ դատական հայց են ներկայացրել: Այդուհանդերձ, օլիմպիական մարզաձևերը խթանելու համար Ռուսաստանի փոխվարչապետը Դադիգինին շքանշան է շնորհել: Եթե չլինեին Դադիգինի նման համբավն ու խեղաթյուրված այլ հրապարակումներ, Եգորյանի հերքումները կարող էին ոչ միանշանակ ընկալում ունենալ:
Առկա հանգամանքները վկայում են, սակայն, որ Եգորյանը ընկել է սկանդալային թղթակցի թակարդը: Ու փաստորեն անկախ հերքումներից՝ Դադիգինին հերթական անգամ հաջողվեց աղմուկ բարձրացնել և հանրության ուշադրությունը կենտրոնացնել իր շուրջը:
