«Ժառանգության» առաջնորդ, նախագահի նախկին թեկնածու Րաֆֆի Հովհաննիսյանն այսօր Ազատության հրապարակում հանրային ժողով էր կազմակերպել:
Ժողովի սկզբում Հովհաննիսյանը նշեց, որ ուղիղ 23 տարի առաջ իրականացավ մեր սերունդների ամենանվիրական երազանքներից մեկը։ «Հայաստանում տեղ գտած արատավոր երևույթները՝ անարդարությունները, արտագաղթը շարունակվում են: Բոլորը գիտեն, որ 80-ը 100-ի դիմաց մենք այսօր ունենք ոչ թե կեղծընտիր, այլ անընտիր նախագահ: Ժողովրդի հետ կարող ենք աղոթել կեղծարարների հոգու համար, քննադատենք, գնահատենք, կոմեդիա անենք, թատրոնի նյութ սարքենք, բայց գործ ունենք անելու և դրա համար այսօր հավաքված ենք»,- ասաց Հովհաննիսյանը:
Նա նաև նշեց, որ հպարտ է, որ այդ գիտակցությունը կա մեր ժողովրդի, առաջին հերթին` ազատամարտիկների, ուսանողների, տրանսպորտի ուղեվարձի թանկացման դեմ պայքարողների բնապահպանական արդարություն ուզողների, ինչպես նաև որդեկորույս ծնողների մոտ․ «Բոլոր մարզերում՝ գյուղացիները, ճար չունենալով, իրենց ձմեռն են ապահովում, և շուտով շրջակա միջավայրին վնաս է հասցվելու: Մենք մեր Անկախության հռչակագիրը դեռ պիտի ի կատար ածենք, օրակարգը ստեղծենք՝ դրա համար պիտի վեր հառնենք անձնակենտրոն մոտեցումներից: Այս հրապարակում թև ու թիկունք՝ ազատամարտիկ, քաղաքացի, կուսակցություն, եթե ուզում է փոփոխություն, ազգի փրկություն, այս ամսվա ընթացքում պիտի կերտի այն ուժը, որ փոխելու է մեր երկիրը: Անելիքների ու գործողությունների մասին կխոսենք, բայց մենք բոլոր ճակատներով պայքարում ենք: Կողմ ենք իրավական, գաղափարական, ազգային միասնության, որտեղ կուսակցություն-նախաձեռնություն-ակտիվիստ-ազատամարտիկ միասին կգան և կկերտեն այդ օրակարգը»:
«Ժառանգության» առաջնորդն անդրադարձավ նաև Սյունիքի նախկին մարզպետ Սուրիկ Խաչատրյանին՝ մասնավորապես նշելով հետևյալը․ «Լիսկան հրաժարական տվեց մարդասպանությունից հետո. այդտեղ ևս կա արդարադատության խնդիր: Մենք հետ չենք կանգնում դրանից, ուրախ ենք, որ մեզ հետ է ազատամարտիկ Սամվել Հայրապետյանը, որը փրկելու է իշխանությունը»:
