ԱՄՆ-ը սկսել է կշեռքի նժարին դնել Սիրիային հնարավոր ռազմական հարվածներ հասցնելու տարբերակները: Այս մասին հայտնում է The Wall Street Journal-ը՝ հղում անելով ամերիկացի պաշտոնյաներին: Վաշինգտոնը նաև դիմել է դիվանագիտական ջանքերին՝ միջազգային հանրության համար մշակելու միջոցառումներ՝ ի պատասխան հավաստումների, որ սիրիական ռեժիմը քիմիական զենքի կիրառմամբ ավելի քան 1100 խաղաղ բնակչի է սպանել։ Այս մասին գրում են լրագրողներ Ադամ Էնտուսնը, Ջուլիս Է.Բարնսն ու Ինտի Լանդաուրոն:
«Հինգշաբթի Պենտագոնի աշխատակիցները թարմացրել են պոտենցիալ ավիահարվածների թիրախների՝ սիրիական կառավարության և զինված ուժերի տարբեր օբյեկտների ցուցակը»,- պաշտոնյաների խոսքերն է մեջբերում թերթը: Դա արվում է այն դեպքի համար, եթե Օբաման որոշի միջադեպի հետ կապված միջոցառումներ ձեռնարկել: Փորձագետներն այդ դեպքն անվանում են ավելի քան 20 տարում քիմիական զենքի կիրառմամբ ամենավատ պատերազմը:Պետքարտուղար Ջոն Քերին հեռախոսազրույց է ունեցել Ֆրանսիայի, Թուրքիայի, Հորդանանի և ԵՄ արտգործնախարարների, ինչպես նաև՝ ՄԱԿ-ի գլխավոր քարտուղարի հետ:
Հոդվածում նշվում է, որ Սիրիայի կառավարությունը հերքում է քաղաքացիների դեմ գազային հարձակում կատարելու մեղադրանքները: Այդ դիրքորոշմանն աջակցում են Իրանն ու Ռուսաստանը՝ հայտարարելով, որ օտարերկրյա թշնամիներն Ասադի համար խարդավանքներ են ստեղծում:
Ամերիկացի պաշտոնյաներն ընդգծել են, որ հարվածների նպատակը կլինի ոչ թե ռեժիմի տապալումը, այլ Ասադին պատժելը, եթե ի հայտ գան համոզիչ ապացույցներ առ այն, որ չորեքշաբթի քիմիական զենքի կիրառման հետևում կանգնած է կառավարությունը:
Թերթի կարծիքով՝ աղբյուրների՝ վերը նշված հայտարարությունները հավանաբար նախազգուշացում են, որը Վաշիգտոնն արել է Ասադին և նրա հովանավորներին: Հայտնի չէ՝ Օբաման պատրա՞ստ է կյանքի կոչել այդ տարբերակները. նա հենց սկզբից զերծ է մնացել հակամարտության մեջ ռազմական ներգրավվածությունից:
Ավելի վաղ Օբաման հայտարարել էր, որ Ասադի կողմից քիմիական զենքի կիրառումը հղի է ԱՄՆ-ի կողմից պատասխան միջոցառումներով:
Գեներալ Մարտին Դեմփսին կարծում է, որ թռիչքազերծ գոտու ստեզծումը շատ ռիսկային է (օդաչուներին կարող են խփել սիրիական հակաօդային պաշտպանության ուժերը), իսկ Ասադի տապալմանն աջակցելը կհանգեցնի արմատական իսլամիստների ուժեղացմանը: Թերթը նշում է, որ ներկայում Պենտագոնում քննարվում են ավելի նեղ տարբերակներ, օրինակ՝ Սիրիայի օդային տարածք դուրս չգալու համար թևավոր հրթիռների կիրառման գաղափարը:
«Այսօր Արևմուտքի առջև մնում է նույն երկընտրանքը. կհաջողվի՞ միջամտել Սիրիայում տիրող իրավիճակին՝ խուսափելով Ռուսաստանի և Իրանի հետ առճակատումից»,- եզրափակում են լրագրողները:
