«Առաջին լրատվական»-ի զրուցակիցն է ՎՍԴՀԿ ատենապետ, ԱԺ պատգամավոր Լյուդմիլա Սարգսյանը։
– Տիկին Սարգսյան, հայտարարել էիք, որ սպասում եք Գագիկ Ծառուկյանի հայտարարությանը Ձեր հետագա գործունեությունը հստակեցնելու համար։ Հիմա արդեն պա՞րզ է, թե ինչ ձևաչափով կմասնակցեք ընտրություններին։
– Տարբեր քաղաքական ուժերի, այդ թվում՝ «Բարգավաճ Հայաստանի» հետ կան բանակցություններ։ Հիմա կարծես ավելի հստակ են մեր անելիքները, բանակցություններն ավելի կոնկրետ կլինեն։ Չեմ բացառում, որ եթե կարողանանք փոխհամաձայնության գալ՝ միասին կգնանք։ Կուսակցությունում այդ հարցը քննարկվել է, մենք մտածում ենք՝ քանի որ Գագիկ Ծառուկյանը լայն դաշինք է ստեղծելու, լավ կլիներ մենք կարողանայինք այդ դաշինքում ընդգրկվել։ Առաջիկա օրերին պարզ կլինի։
– Ընդգրկվել ասելով՝ նկատի ունեք միայն Դո՞ւք, թե՞ կուսակցության այլ անդամներ ևս։
– Կուսակցությունը։ Եթե կուսակցությունների դաշինք է ձևավորում, նախընտրում ենք կուսակցությունը դաշինք կազմի: Հիմա շատ ավելի ակտիվ կլինեն բանակցությունները, ու ավելի տեսանելի կլինի։
– Դաշինքների չկայացման հիմնական պատճառը լինում է տեղերի բաշխումը։ Ձեզ համար կարևո՞ր է, թե որ հորիզոնականում կլինեք։
– Մինչև համաձայնություն չունենանք համատեղ մասնակցության վերաբերյալ, տեղերի մասին խոսելն անիմաստ է։ Կտեսնենք, թե ինչ հնարավորություններ կլինեն։
– Անձամբ փորձելո՞ւ եք Ծառուկյանի հետ հանդիպել։
– Ես ինքս կնախաձեռնեմ հանդիպել իր հետ։ Հատկապես որ հայտարարում է՝ բոլոր քաղաքական ուժերի, մտահոգ գործիչների հետ հանդիպման ու պայքարի կողմնակից է։
– Իսկ հնարավո՞ր է այդ լայն դաշինքում լինի այնպիսի քաղաքական ուժ, որի հետ աշխատելն անհնար համարեք։
– Չի բացառվում, բայց ես չեմ կարծում, որ Գագիկ Ծառուկյանը իր շուրջը կհավաքի այնպիսի քաղաքական ուժերի, որոնց նկատմամբ չկա հանրային վստահություն ու համակրանք։
– Կարծում եք՝ նա հանդես կգա՞ այնպիսի արմատական ընդդիմադիր շարքերից, ինչպիսին որ կար նախքան հայտնի իրադարձությունները։
– Նա միշտ կոռեկտ անձնավորություն է եղել, հստակ ձևակերպել է իր նպատակներն ու մտահոգությունները։ Համարում եմ, որ նա լուրջ ընդդիմադիր գործիչ է։ Համենայնդեպս, նա իշխանության հետ դաշինք չկազմելով՝ ակնկալում է ընդդիմության ձայները, ինչը և արդարացված է։
– Հնարավո՞ր է, որ իշխանությունները իր հետ նորից նույն կերպ վարվեն։
– Եթե իշխանություններն այդ ճանապարհով գնան, ապա այս անգամ իշխանությունն է իր քչաթիվ ձայները կորցնելու ու հանրային մեծ ընդվզման առիթ տալու։
