Երկրի արտաքին քաղաքականության համար պատասխանատվություն պետք է կրի միայն մեկ գերատեսչություն: Այսպես է կարծում Իրանի նախագահ Հասան Ռուհանիի կողմից երկրի ԱԳ նախարարի պաշտոնի համար առաջադրված թեկնածու Մուհամմեդ Ջավադ Զարիֆը, հաղորդում է պետական IRINN հեռուստաալիքը:
Նրա խոսքերով՝ արտաքին աշխարհում հաջողությունների կարող է հասնել միայն Իրանի արտաքին քաղաքական գերատեսչությունը և ոչ թե դրան զուգահեռ գերատեսչությունները:
Զարիֆը նշել է, որ արտաքին քաղաքականության մեջ անհրաժեշտ է փոխադարձ վստահություն, որը չի կարող միակողմանի լինել, և աշխարհը նույնպես պետք է նվաճի իրանցի ժողովրդի վստահությունը։
«Նախարարության քաղաքականությունը կհիմնվի իրատեսության, ինքնավստահության և ինքնագիտակցության վրա՝ երկրի պոտենցիալի ընդլայնման նպատակով փոխըմբռնում և վստահություն կառուցելու համար»,- ասել է նա:
Նրա խոսքերով՝ «համեստ վարչակազմը» կհետևի իրանցի ժողովրդի իրավունքներին բոլոր ոլորտներում, այդ թվում՝ միջուկային խնդրին առնչվող հարցերում:
