«Անտարես» հրատարակչության տնօրեն Արմեն Մարտիրոսյանը լրագրողների հետ հանդիպմանը ներկայացրեց, թե ինչպես են Թուրքիայում ոստիկաններն իրենց հրավիրել բաժին` հարցաքննելու: Թուրքիա մեկնել են չորսով` ինքը՝ հրատարակչության տնօրենը, «Ա1+»-ի լրագրող Մհեր Արշակյանը, հասարակայնության հետ կապերի մասնագետ Լեռնիկ Դալլաքյանը և «Անտարես»-ի վաճառքի տնօրեն Աննա Հովհաննիսյանը:
Արմեն Մարտիրոսյանը մեկնել էր հրատարակչական, կայքերի պատրաստման և հումքային շուկայի ուսումնասիրության նպատակով:
«Վանում նախորդ տարի երկրաշարժ էր եղել, Մհերն ասաց` այստեղ շատ տնակներ են եղել, բայց մի քանիսն էին մնացել: Կողքին մեծ շենքեր կային, լվացք կար փռած, ոչ մի կասկած չկար, թե ինչ էր: Որոշեցինք նկարել: Այդ պահին մի կարմիր մեքենա կանգնեց, ոստիկաններ իջան, ցույց տվեցին ոստիկանական քարտը, վերցրին Մհերից նկարածը: Հարցրին, թե ոստիկանական շենքը նկարելու ինչ իրավունք ունենք, մեր անձնագրերը վերցրին, զանգեցին ինչ-որ տեղեր, իրար հետևից մի քանի մեքենա եկան»,- պատմեց Արմեն Մարտիրոսյանը:
Հետո հայ զբոսաշրջիկներին մի քանի անգամ խուզարկել են, զանգերին արգելել են պատասխանել, տեխնիկան` հեռախոսը, այփադը և այլն, վերցրել են: Հետո նստեցրել են մեքենա ու տարել են:
«Բանտ էր, մեզ ոչ բանտային հատվածում նստեցրին։ Այնտեղ տարբեր ազգերի ներկայացուցիչներ կային, բանտ էր, մեր հեռախոսները, սարքերը տարան մյուս սենյակ՝ ստուգելու, անձնագրերը պատճենահանեցին, մի անգիլախոս եկավ, ասաց` մի անհանգստացեք, ստուգում են, հարցրեց` ինչո՞ւ եք եկել, ի՞նչ է «Անտարես»-ը, ինչքա՞ն է ստանում Հայաստանում ոստիկանը և այլն»,- պատմեց Արմեն Մարտիրոսյանը:
Մոտ չորս ժամ տևած ստուգումներից հետո հայերին ուղեկցել են հիվանդանոց, որ հետո չկարողանան բողոքել, թե թուրք ոստիկաններն իրենց բռնությունների են ենթարկել: Բժիշկները երկար զննելուց հետո տեսել են, որ ոչ մի կապտուկ չկա: Հետո ոստիկանները հարցրել են, թե էլ ուր են գնալու, ի վերջո ոչինչ չեն ջնջել նրանց նկարահանած նյութերից:
Արմեն Մարտիրոսյանի խոսքերով` իրենք «ծանր սթրես» են տարել, քանի որ անհայտ էր, թե ինչ կլինի իրենց հետ: Հայերի նկատմամբ վերաբերմունքը լավ է եղել, «Անտարես»-ի տնօրենը պատճառը չգիտի, մտածում է` գուցե շինծու էր, գուցե այլ բան կար, գուցե անկեղծ էր: Ի վերջո, այսքանից հետո նա ամենից շատ կարևորում է այն, որ հրաշալի տարածքներ ենք կորցրել:
Լուսանկարը՝ PanARMENIAN Photo-ի